ÇĔНĔ ÇУЛĂН иккĕмĕш кунĕнче Пăлапуç Нурăсĕнчи райпо магазинĕнче каçхине сасартăк вут-çулăм алхасма пикеннĕ. Районти пушар надзорĕн начальникĕ Андрей Тукмаков хаçат редакцине пĕлтернĕ тăрăх инкек электропроводкăран тухнă тесе шутлаççĕ. Çывăх кунсенчех ăна экспертсем пайăрлатĕç. Пушарта чылай тавар çунса юрăхсăра тухнă. Январĕн 4-мĕшĕнче вара Патăрьелĕнчи тĕп больницăри травматологи уйрăмĕнчи массаж пỹлĕмĕнче чутах пысăк инкек пулман. Ăшăтакан кăмакан пульчĕ йĕркеллĕ ĕçлеменрен пушар тухма тытăннă. Инкеке вăхăтра парăнтарнă. Унта сипленекенсем никам та сиенленмен.