Алманчă ялĕнче çуралнă. Кунти вăтам шкултан вĕренсе тухнă хыççăн И. Н.Ульянов ячĕллĕ Чăваш патшалăх университечĕн историпе филологи факультетĕнче пĕлỹ пухнă. Л.Ковалюк ВЛКСМ райкомĕнче шкул пайĕн заведующийĕнче ĕçленĕ. 8 çула яхăн республикăри пĕлỹ учрежденийĕсенче чăваш чĕлхипе литературине вĕрентнĕ, хулари çамрăксен общежитийĕнче воспитательте тăрăшнă. Нумай çул республикăри кĕнеке юратакансен обществине ертсе пынă. Л.Ковалюк - Раççей журналисчĕсен тата писателĕсен союзĕн членĕ, Митта Ваçлей премийĕн лауреачĕ, Чăваш Республикин культурăн тава тивĕçлĕ ĕçченĕ. Паян вулакана Лидия Алексеевнăн юлашки вăхăтра çырнă сăввисемпе паллаштаратпăр.

Мĕн вăл Çĕнĕ çул тени?

- Сивĕ хĕл те юр выртни,

 Урамри шуçлак-пăрлак,

- Аксиома ку, паллах.

Пурте - вăйă картинче,

Капăр чăрăш - варринче.

Йăлтăр-йăлтăр, йăлтăрти,

Çутă-çутă çăлтăрпи,

Килтĕн эс савăнтарма,

 Сăвă-юрă юхтарма.

Купăс сасси ян та ян!

Çитрĕ Хĕл Мучи, тăван.

Тăрăр çаврана, атьсем,

Шăрататпăр юрăсем.

Çакă вăл - телей, уяв,

Кучченеçшĕн-мулшăн тав:

Савăнăç, кун-çул сĕнни,

Çĕн çулта телей сунни!

Х Х Х

Çĕрĕм-шывăм карттине тикĕслесшĕн ют,

Тĕп Европа варринче вăл тăвасшăн çурт,

Хатĕр самантрах лартма мишавай юпи,

Уншăн пирĕн аслă çĕр - пăнчă çеç эппин.

Хỹхĕм çăлтăрлă тỹпе, Атăл, хум сикки,

Улăх-хир, çырма-çатри,

Чăваш Ен чикки.

Карăк-пăчăрлă вăрман, ĕнĕрлен хăва.

Парĕç хал çитес çулта, пурăнма хăват.

Сăхă несĕллĕ пулма вĕрентмен пире,

Чунлантарнă ачаран юратма ире.

Тăнăç пурнăç пуласса шанăçпа кĕтер,

Ют-ултавçă ĕмĕлкки кайĕ, ĕненер!

Х Х Х

Сансăр сивĕ мана çав тери,

Эс, савниçĕм - иленкĕ

Турри, Лăпкă çил, сар хĕвел те çеçке,

Тутлă çимĕç, им, наркăмăш-çке.

Ырă аист, шырамăп сана:

Тунсăха эс сирсессĕн кăна,

Хураскерĕм, килсемччĕ вĕçсе,

 Эп йăл кулăп шевлеллĕн çиçсе.

Шанмасассăн, эс, тусăм çакна?

- Çухатан ăраскал-шăпана.

Х Х Х

Пĕрре килетпĕр тĕнчене, пĕрре!

Çĕр хут, пин хут каланă кун çинчен.

 Мĕн-ма çакна манатпăр, чĕмере?

Вăрçатпăр, кỹлешетпĕр темĕнччен.

 Пĕрне-пĕри савса та юратса,

Юратура телейлĕ кун тупса

Утасчĕ килĕшỹллĕ сăмахпа

Куласчĕ çĕкленỹллĕ сасăпа.

Х Х Х

Чĕннипе чĕнменни çук усси:

Ахлату та пĕр сăнчăр сасси.

 Тĕнчемĕр хĕрри вăл илемлĕ,

 Туртать хăй патне илĕртỹллĕн.

Унта... Саянсен хыçĕнчен

Утмалла, утмалла инçете.

Мĕн калайăн: тĕнчемĕр хĕрри!

Шухăшлатăн: çитме май пур-и?

Чалăш çумăрпалан сив çилсем,

Аякри хура пысăк чулсем...

Çакăнта пуль Раççейĕн чикки,

Ун пуçламăшĕ - çĕр иленки.

–- иленки - илем