Патăрьел муниципалитет округĕн пуçлăхĕ Рудольф Селиванов Патăрьел тата Шăмăршă районĕсен çар комиссарĕпе Евгений Семеновпа пĕрле Украина территорийĕнче ятарлă çар операцинче пуçне хунă Николай Киркинăн ашшĕ-амăшĕпе - Илья Николаевичпа тата Нина Владимировнăпа - тĕл пулнă.

- Сирĕн ывăлăрăн паттăрлăхĕ çамрăксемшĕн яланах тĕслĕх вырăнĕнче пулать. Çĕршывăн чăн-чăн патриочĕ. Николай паттăрлăхпа, хăюлăхпа, хастарлăхпа палăрнă. Эпир çĕршыв пуласлăхне хỹтĕлесе куçне хупнă паттăрсене яланах асра тытатпăр, - тенĕ Рудольф Васильевич Илья Николаевичпа Нина Владимировнăна ывăлĕн Паттăрлăх орденне (вилнĕ хыççăн тивĕçнĕ) панă май.

Тĕл пулура Çĕньял территори уйрăмĕн начальникĕн тивĕçĕсене пурнăçлакан Мария Мадюкова тата Патăрьел муниципалитет округĕн депутачĕсен Пухăвĕн депутачĕ Борис Емельянов та пулнă. Мария Ильинична Киркинсем маттур, паттăр ывăл çитĕнтернине, ăна тивĕçлĕ воспитани панине палăртнă.

Илья Николаевичпа Нина Владимировна хăйсене çапла тимлĕх уйăрнăшăн, ывăлне манманшăн тав тунă.

(Хамăр корр.)