Акатуй-Сабантуй - çурхи ака-суха ĕçне вĕçленĕ хыççăн мĕн пур халăх пĕрле савăнмалли йăлана кĕнĕ уяв. Вăл тĕрлĕ наци çыннине, ватти-вĕттине пĕрлештерет, çав вăхăтрах уйрăм хастарсен ĕçри пултарулăхĕпе, ăсталăхĕпе, спортри çитĕнĕвĕпе паллашма, пĕр-пĕринпе кăмăлтан хутшăнма май парать. Патăрьел муниципалитет округĕнче 71-мĕш хут йĕркелекен уяв июнĕн 10-11-мĕшĕсенче иртет.

Çак кунсенче Юхмапа Пăла тăрăхĕнче Акатуй-Сабантуя хатĕрленсе ирттерсе ярас тĕллевпе ĕçлекен комитетăн ларăвĕ иртнĕ. Ăна Патăрьел муниципалитет округĕн пуçлăхĕн пĕрремĕш çумĕ - тирпей-илем тата территорисен аталанăвĕн управленийĕн начальникĕ Николай Раськин ертсе пынă.

Оргкомитет "Хĕвеллĕ" уçланкăра иртекен уявăн тематика площадкисене, вĕсемшĕн яваплă çынсене палăртнă, территори пайĕсен халăхăн ăс-хакăлĕпе культурине кăтартакан çуртсене капăрлатмаллине, мероприятисен планне пăхса тухнă.