Ачасене кĕнекене юратма мĕн пĕчĕкренех хăнăхтармалла. Çак тĕллевпе Патăрьелĕнчи ача-пăча библиотекинче тĕрлĕ мероприяти иртет. Ку хутĕнче вулавăшра "Юмах" ача садĕнчи аслă ушкăна çỹрекенсем пулчĕç. Библиотекарьсем "Хĕвел ури" ушкăн ачисене хапăл туса кĕтсе илчĕç. Литература фондĕнче шăпăрлансем хăйсене лабиринта лекнĕнех туйрĕç.

Вулавăшра ĕçлекенсем çитĕнекен ăрăва кĕнекепе усă курмалли йĕркесене ăнлантарса пачĕç. Ачасене уйрăмах вулав залĕнчи илемлĕ кĕнекесемпе журналсем тыткăнларĕç.

Библиотекарьсем шăпăрлансене юратнă писатель Корней Чуковский çырнă "Мойдодыр" произведение сасăпа вуласа пачĕç, викторина ирттерчĕç.

Вулавăшра хăнара пулни ачасене малашне кĕнекепе туслашма пулăшасса шанаççĕ аслисем.

А. ИГОЛКИНА, вулавăшри ача-пăча уйрăмĕн заведующийĕ