"Орленок" тата "Зарница" çарпа патриотла вăйăсене кăçал Тăван çĕршывăн Аслă вăрçинче Çĕнтерỹ тунăранпа 79 çул çитнине халалланă.

Муниципаллă тапхăрти тупăшăва виçĕ ỹсĕм категорийĕпе вăтам тата пĕтĕмĕшле пĕлỹ паракан шкулсен 23 команди хутшăннă.

 Чыслă лару-тăрура уçнă хыççăн стройпа утмалли, алă вăйĕпе, турникран туртăнса çĕкленмелли, вырăнтан сикмелли, радиаци, хими, биологи хỹтĕлевĕн никĕсĕсене тĕпе хумалли тата ытти конкурссем иртнĕ.

Çитĕнекен ăру 3 кун хăйĕн пултарулăхне, вăй-халне, теори пĕлĕвне кăтартнă. Ачасем умма лартнă тĕллевĕсене пурнăçланă, пысăк кăтартусемпе палăрнă.

"Орленок" ушкăнра Первомайскинчи вăтам шкул команди (сăн ỹкерчĕкре) пĕрремĕш, Патăрьелĕнчи пĕрремĕш - иккĕмĕш, Турханти вăтам шкул команди виççĕмĕш вырăнсене йышăннă.

"Зарницăра" Нăрваш Шăхалĕнчи вăтам шкул пĕрремĕш, Çĕньялти пĕтĕмĕшле пĕлỹ паракан тĕп шкул - иккĕмĕш, Ыхра Çырминчи вăтам шкул - виççĕмĕш вырăнсенче.

"Зарничкăра" вара Хирти Пикшикри вăтам шкул ачисем пĕрремĕш, Патăрьелĕнчи пĕрремĕш вăтам шкул вĕренекенĕсем иккĕмĕш, Шăнкăртамри пĕрремĕш вăтам шкул патриочĕсем виççĕмĕш вырăнсенче.

 Çĕнтерỹçĕ командăсен муниципалитет чысне республика шайĕнче хỹтĕлемелле пулать.

 Альбина ИВАНОВА