Шăнкăртамри пĕрремĕш вăтам шкул тулли пурнăçпа пурăнать. Вĕрентỹ процесне тивĕçлипе илсе пыма кунта тĕрлĕ секципе кружок ĕçлени те пулăшса пырать. Çавăн пекех педагогсемпе вĕренекенсем тĕрлĕ проект пурнăçа кĕртеççĕ, конкурссене хутшăнаççĕ. Кунта ĕçлекенсем хăйсен ĕç-хĕлне отчетлă концертра та кăтартаççĕ. Кăçал та пулчĕ вăл. Кун пирки шкул директорĕпе Гелсирень Абейдулловăпа сăмах пуçартăмăр. Аяларах çав калаçăва пичетлетпĕр.

- Гелсирень Гадельзяновна, кăçалхине мĕне халалларăр?

- Раççей Федерацийĕнче Çемье, Чăваш Енре Экологи культурин тата çут çанталăк пуянлăхĕпе тирпейлĕ усă курмалли çулталăка. "Чун-чĕре таса юлтăр" ятпа йĕркелерĕмĕр ăна.

- Коллектива, ачасене, ашшĕ-амăшне пĕр тĕвве çыхакан мероприяти ĕнтĕ çакă.

-Тĕрĕсех. Концерт пĕрремĕш класра вĕренекенсемпе вĕсен ашшĕ-амăшĕн театрализациленĕ номерĕпе пуçланчĕ. Туслă та телейлĕ çемье пĕрлĕхне мĕн çиттĕр? Кунта ăру малалла тăсăлать. Йăла-йĕрке упранса юлать. Пурнăçăн пуçламăшĕ çакăнта. Çемьере кăмăл çĕкленет, унта сана ăнланаççĕ, хавхалантараççĕ, савăнăçа пĕрле пайлаççĕ. Кулянмалла чухне шухăша сиреççĕ. –

Патриот теми те тĕпре-ха ĕнтĕ концертра...

 - Çапла. Сăр тата Хусан хỹтĕлев чиккисене тума хутшăннă саманта куç умне кăларма "Сăр шурăмпуçĕ лăпкă..." театрализациленĕ представлени пулăшрĕ. Унта çак ĕçе явăçнă ентешсене аса илнĕ. Тăван çĕршывăн Аслă вăрçинче çĕнтерĕве çывхартма пулăшакансен паттăрлăхĕ витĕмлĕ курăнать унта. Куççуль кăлармасăр пăхса та лараймăн.

- Ачасен пултарулăхĕ тĕлĕнтерет. Ташă-юрă ăстисем, алла хут купăс тытакансем сахал мар сирĕн.

- Каллех çитĕнекен ăрупа аслисен çыхăнăвĕ çирĕп пулнăран ĕç-хĕл ăнать. Илĕртỹллĕ тумсем çĕлеттерме пултарни те кăмăла уçать. "Биляр" ансамль ташшисем кама килĕшмĕç? Артистсем муниципалитет округĕнчи, республика шайĕнчи конкурссенче пĕр хутчен çеç мар çĕнтернĕ. Вĕсемсĕр концертсем те сайра иртеççĕ.

- "Тамчы" ансамбль пирки те чарăнса тăрар-ха...

- Шкулта Патăрьелĕнчи ачасен ăсталăх çурчĕн филиалĕ ĕçлет. Ăна Альбина Абитова ертсе пырать. Унта 1-4 классенче вĕренекенсем çỹреççĕ. Сцена çине 22 баянист тухрĕ. Ăçта пур çакăн пекки? Музыка инструменчĕпе калама пĕлни хăех мĕне тăрать. Тепĕр чухне ачасене çар ретне ăсатнă чухне те ĕлĕкхи йăла-йĕркене тавăрни вырăнлă. Анчах купăс калакана тупаймаççĕ. Е çуралнă кунсенче ашшĕ-амăшне ташлаттарни те питĕ аван. Çаксене шута илсе-тĕр куракансем номер хыççăн тăвăллăн алă çупрĕç.

- Ытти клубсен ĕçĕ те курăнчĕ концертра...

- Çапла. Минхайдер Валитов ячĕллĕ çарпа патриотла тата "Лидер" спорт клубĕ Илдар Зейнетдинов вĕрентекен ертсе пынипе ятарлă номер хатĕрленĕ.

 - Уйрăм юрăçсем чуна пырса тивекен юрăсемпе кăмăла уçрĕç.

- Çамрăк-ха вĕсем. Ăсталăхĕсем малалла та ỹссе пырасса шанатпăр. Зулия Султеева, Сафия Шакурова, Амина Закирова, Дениспа Джамиль Мифтахутдиновсем, Зулия Халитова, Алиня Тазетдинова, Адиля Мифтахутдинова сцена çинче хăйсене тытма та пĕлеççĕ. Рефисе Валитова, Чулпан Сафиянова, Миляуше Алеева, Талгат Абейдуллов вĕрентекенсем куракансене илемлĕ юрăсемпе тыткăна илчĕç. Вĕсенчен тĕслĕх илеççĕ ачасем, тавра курăмне анлăлатаççĕ. Аслисен канашĕсем çамрăксене тĕрĕс пурнăç çулĕ çине тухма пулăшаççĕ.

- Гелсирень Гадельзяновна, сцена çинче сире тахçантанпах куратăп. Ертсе пыраканни те хăвăрах. Концертпа куракансен умне тухассине хăçан пикеннĕ эсир?

- 2007 çултанпа. Ачасемпе пĕрле ертсе пыратăп. Çитĕнекен ăрупа вĕрентекенсен пултарулăхне мĕншĕн вăрттăнлăхра тытса тăмалла? Ывăл-хĕрĕ халăх умне тухнишĕн ашшĕ-амăшĕ мĕнле савăнать. Хăйсем те тем пекех хĕпĕртеççĕ. Пушă вăхăта ачасем усăллă ирттереççĕ. Уроксем хыççăн репетицисене çỹреççĕ. Килĕшет вĕсене çакă. Пирĕн ĕç те курăнать. Номерсем хыççăн алă çупса хаклани мĕне тăрать. Татах та татах юрлама, ташлама ыйтаççĕ. Çакă мар-и тулли савăнăç, телей, ăнăçу?

- Йăлана кĕнĕ мероприятие малашне те тытса пымалла пултăр. Савăнăçăр çитсе пытăр, ăнăçу çулăра такăрлаттăр.

- Тавах.

Альбина АСТРАХАНЦЕВА калаçнă