ИРТНĔ эрнере, августăн 21-мĕшĕнче, пултарулăхĕпе тĕнче шайĕнче палăрнă ентеш-поэтăмăра, Çĕньялта çуралса ỹснĕ Геннадий Айхие чыс та хисеп туса, унăн ятне асра тытса 90 çулхи юбилейне паллă тунă. Çак ятпа ялти вăтам шкулта "Вăхăт витĕр" ("Сквозь время") ятпа ăрусен тĕл пулăвне йĕркеленĕ. Мероприятие Патăрьел муниципалитет округĕнчи культура, туризм тата информаци тивĕçтерĕвĕн пай пуçлăхĕ Наталия Никитина, Патăрьелĕнчи централизациленĕ библиотека директорĕ Алевтина Овчинникова, Çĕньял территори пайĕн начальникĕ Мария Мадюкова, паллă литературовед Атнер Хусанкай хăйĕн мăшăрĕпе, Чăваш кĕнеке издательствин тĕп редакторĕ Владимир Степанов, Чăваш Республикинчи Наци библиотекин заведующийĕ Татьяна Николаева, поэтăмăрăн ачисем - Вероника, Константин, Анна - çывăх тăванĕсем, поэзи тусĕсем тата ыттисем хутшăннă.

Тĕл пулăва хапăл тунисем Геннадий Айхи ячĕллĕ музейра тата ял вулавăшĕнче пулнă, унăн тĕнче шайĕнче 50 ытла чĕлхепе янăракан сăввисен пĕлтерĕшĕ пирки калаçнă, "Айги: тот самый поэт" кĕнекене пахаланă, юлашкинчен поэтăн вил тăпри çине кайса пуç тайнă, чечек кăшăлĕ хунă.