2025 çула Чăваш Енре Çĕнтерĕве халалласшăн. Çитес çулталăкăн çак тематикине ЧР Пуçлăхĕ çумĕнчи Общество канашĕн ларăвĕнче регион ертỹçи Олег Николаев сĕннĕ.

– 2025 çула патриотизм темине халаллатпăр, - тенĕ Олег Алексеевич. Çитес çул Тăван çĕршывăн 1941-1945 çулсенчи Аслă вăрçинче çĕнтернĕренпе 80 çул çитет. Ятарлă çар операцийĕнче те çĕнтерỹ пуласса ĕненетпĕр - çапла пултăр тесе пĕтĕмпех тăватпăр. Çĕнтерỹ теми, унпа çыхăнни пĕтĕмпех пысăк пĕлтерĕшлĕ. Çав шутра - ачасене воспитани парас, тĕрлĕ енĕпе пысăк çитĕнỹсем тунă çынсене асра тытас ыйтусем те.

 Общество канашĕн председателĕ Наталия Партасова çитес çул тематикипе çыхăннă сĕнỹсене пур муниципалитет округĕ те пĕлтернине палăртнă. Физкультурăпа спорта, йăласене, сывлăх сыхлавне тĕпе хуракан сĕнỹсем пулнă, çапах ытларахăшĕ 2025 çула патриотизмпа çыхăнтарма сĕннĕ.

Александр ИВАНОВ