Патăрьел ялĕ округ центрĕ çеç мар, кунта килекен çынсемшĕн, хăнасемшĕн, туристсемшĕн Юхмапа Пăла тăрăхне пĕтĕмĕшле хак пама пулăшакан "тĕкĕр". Çавăнпа та унăн аталанăвĕ, инфратытăм çĕнелĕвĕ, халăх пурнăçне хăтлăлатас тесе пурнăçланă ĕçсем пысăк пĕлтерĕшлĕ. Ахальтен мар паттăр ене аякран та çывăхран хапăл тунисем чăн малтанах округ пурнăçне, нумай нациллĕ туслă халăхăн ырлăхне, культурипе йăли-йĕркине Патăрьелне кура хаклаççĕ.

 Çакна та палăртма кăмăллă. Юлашки çулсенче центрта çĕнĕ çуртсем çĕкленни, çулсем хăтлăланни, ача-пăча лапамĕсем, спорт площадкисем йышланни, нумай хваттерлĕ çурт таврашĕсем капăрланни тата ытти те патшалăх ялта пурăнакансен интересĕсене мала хунине, вĕсен пуçарулăхне ырланине, ĕмĕт-тĕллевне пурнăçа кĕртнине çирĕплетсе парать.

Патăрьелĕнче ытти территори пайĕсемпе танлаштарсан халăхĕ те йышлăрах пурăнать, урамĕсем, тăкăрлăкĕсем те ытларах, пурăнмалли çуртсем, организаци-предприяти те сахал мар. Урăхла каласан вăйсене пĕрлештерсе кар тăма йывăр мар. Пысăк пуçарулăх çеç кирлĕ. Çакă чăн малтанах патшалăх программисене пурнăçа кĕртсе пыма пулăшать те.

Патăрьел территори пайĕ Чăваш Республикинче пуçару бюджечĕн программипе ĕçлеме пикенсенех çĕнĕлĕхе халăхпа пĕр шухăшлă пулса пурнăçа кĕртме пуçланă. Юлашки 3-4 çула илес пулсан, çак программăпа Табаков, Калинин урамĕсене çул сарнă. Ку ĕçре ял халăхĕпе пĕрлех "Батыревский" пĕрлешỹ (ертỹçи Петр Ялуков) пысăк пулăшу кỹнĕ. Пуçару бюджечĕпех Алексей Талвир, Олег Кошевой урамĕсене тирпейлесе йĕркене кĕртнĕ. Çавăн пекех икĕ çул каялла халăх пуçарăвĕпе, уйрăм предпринимательсен хастарлăхĕпе Молодежная, Славянская урамсене те хăтлăх кĕртнĕ. Иртнĕ çул Ленин проспектĕнчи çула асфальтпа çыхăнтарнă. Çак пархатарлă пуçарура каллех сакăр предприниматель ырă тĕслĕх кăтартса хăйсен тỹпине хывнă. Вĕсен пархатарлă шухăшне ырламалла çеç. Ыттисемшĕн ырă тĕслĕх. Паян çак çулпа автомашинăпа та, çуран та иртсе çỹреме кăмăллă.

 Республикăри пуçару бюджечĕн программипех Çĕнтерĕве 50 çул, Çамрăксен, Славянская урамсенчи çула та тирпейленĕ. Кăçал та Патăрьелсем Чăваш Республикинчи ял хуçалăх министерстви ирттерекен конкурсран икĕ проектпа ăнăçлă тухса Чапаев тата Ярославская урамсене пуçарулăхпа çул сараççĕ. Чапаев урамĕнчи 285 метр çула пуçару бюджечĕпе асфальтпа бетон хутăшне сарса пĕтернĕ (сăн ỹкерчĕкре). Ярославская урамра çулне сарнă хыççăн тавралăха хăтлăх кĕртмелли юлнă.

 Альбина ЕГОРОВА

Чăваш Республикин Министрсен Кабинечĕн Председателĕн çумĕ - ял хуçалăх министрĕ Сергей АРТАМОНОВ:

- Кăçал пуçару бюджечĕн программине пула республикăри ял территорийĕсенче 500 ытла автоçул çĕнелет. Халăх пуçарнă рекордлă проектсен шучĕ Чă-ваш Енре - пин çурă яхăн. Программăпа килĕшỹллĕн общество анлăхĕсене, социаллă сферăпа коммуналлă хуçалăх объекчĕсене хăтлăх кĕртеççĕ. Йăлана кĕнĕ йĕркепе çулсене çĕнетесси тĕп вырăнта тăрать. Мĕн пур ĕçĕн 38 проценчĕ çул-йĕре лайăхлатассипе çыхăннă.