Юлашки çулсенче çыран хĕррисемпе, çын çỹремен вырăнсенче Сосновски пултăранĕ ĕрчеме пуçларĕ. Патăрьел муниципалитет округĕнче вăл 22 гектар ытларах лаптăкра ỹсет. Ỹсен-тăрана Алманчă, Çĕньял, Çĕнĕ Ахпỹрт, Турхан, Пикшик, Кзыл-Чишма, Первомайски, Туçа, Тăрăн ял территорийĕсенче курма пулать. Çын сывлăхĕшĕн сиенлĕскере пĕтерессипе çине тăрсах вăй хураççĕ. Муниципалитет администрацийĕ Владимир Титов предпринимательпе ятарласа килĕшỹ çырнă.

Сосновски пултăрана пĕтерес ĕçе икĕ тапхăра пайланă. Пĕрремĕшне контракт çырнă кунтан пуçласа июнĕн 30-мĕшĕччен, иккĕмĕшне июлĕн 1-мĕшĕнчен пуçласа сентябрĕн 1-мĕшĕччен пурнăçламалла пулнă. Йĕркепе килĕшỹллĕн предприниматель 5,46 гектарти пултăрана çулса, 16,71 гектара хими мелĕпе ашкăрма паман.

Ял территори пайĕсен начальникĕсем гербицидпа сапнă çĕрте ỹсен-тăран лаптăкĕ чакнине палăртаççĕ. Шел пулин те, юхан шывсем, çырансем хĕррипе, çынсем пурăнакан вырăнсенче хими препарачĕпе усă курма юрамасть, çавна май вĕсенче çулаççĕ. Вăрри те тăпрара темиçе çул упраннине шута илсе Сосновски пултăрана пĕтерессипе çитес çулсенче те ĕçлеме тивет.

 Ольга ПАВЛОВА