Шкул театрĕсен "Асам" фестивалĕн муниципалитет тапхăрĕнчи конкурсĕ иртрĕ. Ăна Раççей Федерацийĕнчи Çемье тата Чăваш Республикинчи Экологи культурин тата çут çанталăк пуянлăхĕпе тирпейлĕ усă курмалли çулталăка халалланă.

 18 вĕрентỹ организацийĕ тĕрлĕ жанрлă спектакльсем хатĕрлерĕ. Вĕсенче ачасем артист пулас пултарулăха, сцена çинче хăйсене тытма пĕлнине кăтартрĕç. Тумне те, декорацине те, калаçу шайне те çителĕклĕ шая çитерме тăрăшрĕç. Ĕлĕкхи пурнăçа слайдсемпе усă курса та куç умне кăларма пултарчĕç.

 Муниципалитет шайне 6 коллектив тухрĕ. Вĕсенчен виççĕшĕ - Ыхра Çырминчи вăтам шкулта вĕренекенсем хатĕрленĕ "Вăрçăпа пиçнĕ ачасем" (ертỹçисем Альфия Саберзянова, Райля Вахитова) "Пĕчĕк калăпăшлă чи лайăх спектакль", Аслă Чементи вăтам шкулти "Овация" ушкăн кăтартнă "Француз чĕлхин урокĕ" (Надежда Кошелева) "Пысăк калăпăшлă чи лайăх спектакль", Хирти Пикшикри вăтам шкул артисчĕсем чăвашла сцена çине кăларнă "Тупалча" спектакль (Людмила Данилова, Лилия Ачамова) пĕрремĕш степеньлĕ лауреатсем пулчĕç. Округ чысне республикăра Хирти Пикшикри вăтам шкулта вĕренекенсем хỹтĕлĕç.

Кашнийĕшне пахаламасăр хăварма та май çук. Тарăн шухăшлă вĕсем. Ачасене иртнĕ пурнăçпа паллаштараççĕ. Çăкăр чĕллине çурмалла пайлани хăйех туслăха çирĕплетнине, аслисем кĕçĕннисемшĕн пулнине, çамрăкранах ĕç çумне çыпăçнине кăтартаççĕ.

Патăрьелĕнчи иккĕмĕш, пĕрремĕш, Шăнкăртамри пĕрремĕш, Пăлапуç Пашьелĕнчи вăтам шкулта вĕренекенсем иккĕмĕш степеньлĕ лауреат дипломĕсене тивĕçрĕç.

 Çавăн пекех фестивале хутшăнакансем калăпланă уйрăм рольсене те пахаларĕ жюри. "Чи лайăх арçын ролĕ" номинацие Хирти Пикшикри вăтам шкулти Д.Кириллов тивĕçрĕ. "Чи лайăх хĕрарăм" рольне Аслă Чементи вăтам шкулти С.Игнатьева çĕнсе илчĕ.

Шăнкăртамри пĕрремĕш тата Хирти Пикшикри вăтам шкулсен коллективĕсем артистсен костюмĕсене суйласа илес тĕлĕшпе палăрчĕç.

"Чи лайăх декораци" Ыхра Çырминчи вăтам шкулăн пулчĕ. Пăлапуç Пашьелĕнчи "Премьера" театр коллективĕн ертỹçи Светлана Никитина "Чи лайăх режиссер ĕçĕ" номинацие тивĕçрĕ. Сăмах май çакна та палăртмалла. Светлана Петровна жюри умне кăларнă "Çемьесем тĕрлĕрен пулаççĕ" спектакле хăй çырнă. Унта тĕп тема - ачасене тĕрĕс воспитани парасси. Ултав çиеле тухать, ырă усала çĕнтерет.

 Аслă Чементи вăтам шкул коллективĕ хатĕрленĕ "Француз чĕлхи урокĕ" спектакле те Надежда Кошелева хăй калăпланă. Вĕренекенĕсем ют чĕлхепе аванах калаçаççĕ.

Çĕнтерỹçĕсене муниципалитет округĕнчи вĕрентỹ, çамрăксен политики, физкультурăпа спорт управленийĕн специалисчĕ Любовь Раськина тата иртнĕ çулхи конкурсра мала тухнă Шăнкăртамри пĕрремĕш вăтам шкул ертỹçи Гелсирень Абейдуллова саламларĕç.

 Мĕн палăртма пулать-ха юлашкинчен? Хăшĕсем пĕлтĕрхи спектаклĕсене çеç кăштах çĕнетме тăрăшнă. Теприсем тумĕсене çавсенех суйласа илнĕ.

Проекта кăмăлтан хутшăнни аван. Тен, çак енĕпе малашлăх пурнăçа çыхăнтаракан çамрăксем те пулĕç. Сцена çинче пулни вĕренỹре те хавхалантарать. Ачасем сăвăсене асра юлмалла вулама хăнăхаççĕ. Литературăна, тăван ен культурине ытларах тимлĕх уйăрма вĕренеççĕ. Ушкăнпа ĕçлени те кăмăллă.

Альбина АСТРАХАНЦЕВА