Патăрьелĕнчи централизациленĕ библиотекăри çамрăксем валли уçнă "Манăн территори" лапамра çитĕнекен ăру çеç мар, хисеплĕ ĕç ветеранĕсем те час-часах пуçтарăнса чуна ăшăтакан мероприяти ирттереççĕ. Нумай пулмасть çеç вулавăш çумĕнчи "Савăнăç" ("Радость") клуб членĕсемпе Патăрьел муниципалитет округĕнчи пенсионерсен уйрăмĕн хастарĕсем тĕл пулу йĕркеленĕ. Мероприятие Патăрьел муниципалитет округĕн администрацийĕн культура, туризм тата информаци тивĕçтерĕвĕн пайĕн специалист-эксперчĕ, пенсионерсен вырăнти уйрăмĕн председателĕ Полина Логунова, Раççей социаллă фончĕн Чăваш Республикинчи клиентсен службин Патăрьелĕнчи уйрăмĕн ертỹçи Дмитрий Федоськин, Юхмапа Пăла тăрăхĕнчи пенсионерсен партийĕн председателĕ Федор Урмаков хутшăннă.

Тĕл пулăва клуб ертỹçи Наталия Ракова ертсе пынă. Вăл аслă ăру хастарĕсен, уйрăм çемьесен пуçарăвĕпе йĕркеленсе пыракан мероприятисем яланах кăсăклă иртнине, кĕмĕл волонтерсем общество пурнăçĕнче, культурăра, спортра та хăйсен пултарулăхĕпе палăрнине, вулавăша та час-часах çỹренине, çамрăксемшĕн ырă тĕслĕх пулнне палăртнă.

- Чыс та мухтав хисеплĕ ватăсене. Вĕсен хастарлăхĕ иксĕлми пулни çамрăксене те çунатлантарать. Акă, кăçал та кĕмĕл волонтерсем республикăра тивĕçлĕ канăва тухнисем хушшинче йĕркеленĕ "Чечек уçланки-2024" конкурсра хăйсен пултарулăхне, ăсталăхне, маçтăрлăхне кăтартрĕç. Çак конкурсра "Манăн садри чечексем" номинацире Тутар Сăкăтĕнчи Гельнур Сабитова республикăра пĕрремĕш вырăн йышăнчĕ, Патăрьелсен ĕçченлĕхне, пултарулăхне кăтартса пачĕ,- çапла хак панă пенсионерсен пĕрлĕхĕн ертỹçи Полина Логунова хăйĕн сăмахĕнче.

Сăмах май каласан, пĕлтĕр çакнашкал конкурсра Эвелина Карягина çĕнтернĕччĕ. Тĕл пулăва хутшăннисене автор хăйĕн пахчинче çитĕнтернĕ çеçкесенчен хатĕрленĕ "Вальс цветов" презентацийĕпе те савăнтарнă.

Аслă ăру çыннисен тĕл пулăвĕнче муниципалитетсем хушшинчи культурăпа спорт мероприятийĕнче палăрнă ветеренсене саламланă, пурне те хастарлăхшăн тав тунă.

 Тĕл пулăва хутшăннисене Кĕçĕн Патăрьелĕнчи клуб системинче тăрăшакан культура ĕçченĕсем чуна тыткăнлакан юрăсемпе саламланă.

 Альбина НИКОЛАЕВ