Медицина ĕçченĕсем пациентсен сывлăхĕшĕн çеç тăрăшмаççĕ, сиплев учрежденийĕн таврашĕнче хăтлă та илĕртỹллĕ пултăр тесе те тимлеççĕ. Çак кунсенче вĕсем 40 тĕм çăкапа чăрăш хунавĕсене лартрĕç. Мероприятие кунта темиçе теçетке çул вăй хунă тата тин çеç ĕçе пикеннĕ çамрăк специалистсем хутшăнчĕç.

 "Çакнашкал пĕрлехи мероприятисем тĕрлĕ ăрури çынсене çывăхлатаççĕ те. Ырă йăлана малалла тăсни те кăмăллă. Хунавсене лайăх пăхса ỹстересчĕ. Вĕсем тымар ярасса шанатăпах. Ун чухне больница территорийĕтата илемленĕ",- терĕ Николай Тинюков тĕп тухтăр.

 "Мероприятие хавхаланса хутшăнтăмăр. Маншăн пысăк чыс та пулчĕ çакă. Йывăç лартни вăл пурнăç тăсăмĕн палли евĕрех. Кашни хунав тымар ярса пациентсемпе медицина ĕçченĕсене савăнăç кỹрессе шансах тăрас килет",- хăйĕн шухăшне палăртрĕ Алексей Муллин çамрăк педиатр.

 Çак ĕç тухтăрсен кашни çĕнĕ ăрăвĕ кунти йăла-йĕркене тата ăсталăха малалла тăсса, аталантарса пынине те çирĕплетет. Çулсем иртнĕçемĕн больница йĕри-тавра йывăç кашлĕ. Симĕс тавралăх çынсен сывлăхĕшĕн те сиплĕ пулĕ.

Альбина ИВАНОВА