Патăрьелĕнчи "Паттăр" стадион ку хутĕнче футбол вăййине ăста вылякансене чыслакан арена пулса тăнă. Кунта 40 çултан иртнĕ ветерансем хушшинче Чăваш Республикин Кубокне тивĕçнĕ "Темп" командăна саламланă.

Чыслава сумлă хăнасем килнĕ. Вăл шутра Патăрьел муниципалитет округĕн пуçлăхĕ Рудольф Селиванов, Елчĕк муниципалитет округĕн пуçлăхĕ Леонард Левый, Чăваш Республикин Патшалăх Канашĕн депутачĕ Валерий Антонов, спорт федерацийĕсен представителĕсем тата, паллах, футболистсем.

Тухса калакансем "Темп" ырă тĕслĕхлĕ, нумай çул спорта парăннă çынсен команди пулнине палăртнă. Ăна 2012 çулта йĕркеленĕ. 40-50 çулсенчи ăста вăйăçсене пĕрлештерсе тăрать. Вĕсем хăйсен пурнăçĕн пысăк пайне футбола халалланă.

 Республика кубокне тивĕçни - нумай çулхи тăрăшуллă ĕç. Историе юлакан çитĕнỹ нумай-нумай тренировкăн, çĕнтерỹçĕсен вăййисене тĕплĕн тишкерни, командăпа вылянин тăрăшуллă ĕçĕ те. Пĕтĕмĕшле çĕнтерĕве кашни хăйĕн тỹпине хывнă: чăтăмлăхпа, выляма юратнипе палăрнă. Вĕсем çак ỹсĕм çулĕсенче те спортра çитĕнỹ тума пултарнине çирĕплетнĕ.

Чыслав кунĕнче Патăрьелсен "Темп" командипе Çĕнĕ Шупашкарсен "Заря" ушкăнĕ тĕл пулса финалта вылянă. Пăлаçипе Юхма Ен спортсменĕсем 5:3 шутпа çĕнтернĕ.