Патăрьел муниципалитет округĕнче иртнĕ эрнере йĕркеленĕ асра юлмалли паллă мероприятисенчен пĕри нумай çул Ленин орденлĕ "Гвардеец" колхоз председателĕнче ырми-канми тăрăшнă Социализмла Ĕç Геройĕ Михаил Герасимович Долгов çуралнăранпа 120 çул çитнине сумлă лару-тăрура паллă туни пулчĕ.

Мероприятие Патăрьел муниципалитет округĕн пуçлăхĕ Рудольф Селиванов, Чăваш Республикин Патшалăх Канашĕн депутачĕ Валерий Антонов, Патăрьел муниципалитет округĕнчи депутатсен Пухăвĕн председателĕ Николай Тинюков, Чăваш Ен ветеранĕсен канашĕн председателĕ Александр Самылкин, республикăри тата муниципалитет округĕнчи АПК ветеранĕсем, студентсемпе вĕренекенсем, Михаил Долговăн тăванĕсемпе ентешĕсем тата ыттисем те хутшăнчĕç.

Нумай çул колхоз председателĕнче тỹрĕ чунпа тăрăшса республикăра çеç мар, Совет Союзĕнче те палăрнă хисеплĕ ентешĕмĕре чыс туса йĕркеленĕ уяв унăн тăван ялĕнче, Анат Туçара, пуçланчĕ. Чăн малтанах Михаил Герасимович канлĕх тупнă ял масарне кайса унăн вил тăпри умĕнче пуç тайрĕç, чечексем хучĕç. Ун хыççăн вăл çуралса ỹснĕ, кунта пурăннă Арман касри çурт çине Асăну хăми вырнаçтарчĕç. Çак паллă унăн хисеплĕ ят-сумне тата нумай-нумай çул хушши халăхра упрама май парĕ.

 - Михаил Долгов чăн-чăн ĕç паттăрĕ, кăтартуллă та пултаруллă хуçалăх ертỹçи пулнă. Вăл ял, колхоз, район мăнаçлăхĕ çеç мар, унăн ячĕпе сумĕ республика, Совет Союзĕ таран кĕрленĕ. Паян унăн ырă ĕçне Юхмапа Пăла тăрăхĕнчи çĕр ĕçченĕсем малалла тăсаççĕ. Патăрьел муниципалитет округĕнчи агропромышленность, продукци тирпейлекен предприятисем начар мар аталанса пыраççĕ. Михаил Герасимовичăн пархатарлă ĕçĕсем, унăн çутă сăнарĕ халăхра ĕмĕр-ĕмĕр упранĕ,-терĕ Патăрьел муниципалитет округĕн пуçлăхĕ Рудольф Селиванов Асăну хăмине уçнă май.

Юхмапа Пăла тăрăхĕн ĕç паттăрне халалланă юбилей уявĕ Патăрьелĕнчи централизациленĕ клуб системинче малалла тăсăлчĕ. Фойере Михаил Долгов ячĕпе ачасен пултарулăх шкулне çỹрекен ỹнер ăстисем "Честь и хвала труженикам сельского труда" курав йĕркеленĕ. Кунтах Ленин орденлĕ "Гвардеец" колхозăн историйĕпе, ытти ĕç паттăрĕсемпе те паллашма май пулчĕ.

Залра пултаруллă та талантлă аграрник, мал ĕмĕтлĕ ертỹçĕ ячĕпе йĕркеленĕ мероприяти малалла тăсăлчĕ. Чăваш АССРĕн тава тивĕçлĕ агрономĕ, Социализмла Ĕç Геройĕ Михаил Герасимович Долгов ячĕпе ỹкернĕ фильм ертỹçĕ чăнласах та халăхпа пĕр чĕлхе тупса пысăк ĕçсем тума пултарнине, "Гвардеец" колхозри ытти ĕç паттăрĕсен манăçми çитĕнĕвĕсене кăтартса пачĕ.

Патăрьел муниципалитет округĕн пуçлăхĕ Рудольф Селиванов хăйĕн сăмахĕнче Юхмапа Пăла тăрăхĕнче пурăнакансем паянхи кун та "Гвардеецсен" хавалĕпе хавхаланса ĕçлесе пынине палăртрĕ. Туçари вăтам шкул директорĕ Петр Шашкин Михаил Долгов пурнăçĕпе, вăл ертсе пынă хуçалăх аталанăвĕпе тĕплĕн паллаштарчĕ докладра. Çавăн пекех тухса калаçакан ытти ĕç ветеранĕсен сăмахĕнче те Ленин орденне тивĕçнĕ кăтартуллă хуçалăх аталанăвне, ăста ертỹçĕн пур енлĕ пултарулăхне уçса пачĕç.

Патăрьелĕнчи централизациленĕ клуб системи çумĕнчи юрăпа ташă ансамблĕ ЧР культурăн тава тивĕçлĕ ĕçченĕ Петр Никитин ертсе пынипе илемлĕ юрăсем шăрантарчĕ.

Альбина ЕГОРОВА

 ШУХĂШ

Маргарита МУЛЮКОВА, ученăй-зоотехник:

- Пирĕн атте чун-чĕререн хăйĕн ĕçне, халăха юратнине ас тăватăп. Пире те мĕн пĕчĕкрен усăллă ĕç тума, ăна вара кăмăлтан пурнăçлама хăнăхтаратчĕ. Аттепе аннен тивĕçлĕ воспитанине пулах тăватсăмăр та пурнăçра тĕрĕс çул суйласа илтĕмĕр. Михаил Герасимовича хисеп туса пысăк мероприяти йĕркеленĕшĕн чун-чĕререн муниципалитет округĕн администрацине, республикăри ветерансен канашне тав тăватпăр.