Юлашки çулсенче Хирти Пикшикри вăтам шкул çурчĕ тĕпрен çĕнелсе улшăнчĕ. Территорие тирпейленĕ. Çĕнĕ стадион тунă. Унта пыракан çула брусчатка сарнă. Спорт оборудованийĕсене вырнаçтарнă. Вылямалли лаптăк - резина кавиртен.

Хĕллехи вăхăтра Кĕçĕн Арапуçĕнчи спорт лапамĕнче йĕлтĕр сыраççĕ. Ăна çутăпа тивĕçтернĕ. Халĕ унта республика шайĕнчи ăмăртусем те иртеççĕ.

Вĕренỹ çурчĕ хуларинчен пĕрре те кая мар.

"Выртакан чул айĕнчен шыв юхмасть" текен ваттисен сăмахĕнчен пуçларĕ калаçăва шкул директорĕ Илдар Камалетдинов çанталăк сивĕтсе пынăран вĕренỹ учрежденийĕ умне вырнаçтарнă фонтана ĕçлеме чарнă май. Вăл та çĕнĕлĕх. Нихăш шкулта та çакнашкалли çук. Б

юджетран уйăрнă кашни тенкĕ вырăнлă усă курăнать кунта. Кивĕ строительство материалĕсене те сая ямаççĕ. Çурт тăрринчен сỹтнĕ шăвăçа гараж тăррине витсе хунă.

Ашшĕ-амăшĕ те çитĕнекен ăрăва туллин аталанса ỹсме пулăшать. Пикшик территори пайĕнчи "Молочные зори" предприяти администрацийĕ алă тăсса пама кирек хăçан та хатĕр. Чăваш Республикин Патшалăх канашĕн депутачĕ Валерий Антонов патне те çул хывнă кунта ĕçлекенсем.

5 ялтан 225 ача пĕлỹ пухать кунта. Çитĕнекен ăрăва икĕ шкул автобусĕ Кĕçĕн Арапуçĕнчен, Именкассинчен, Тикешрен, Еншикрен турттараççĕ.

Кадрсем çителĕклĕ. Иртнĕ вĕренỹ çулĕсенче çамрăк специалистсем те хутшăннă. Иккĕмĕш çул вĕренекенсем муниципалитет шайĕнчи олимпиадăсенче çĕнтерỹçĕсен йышĕнче пулса шкула призерсен йышне кĕртеççĕ. Диана Иванкина биологипе, математикăпа, Зарина Чаштанова химипе, Ландыш Каштанова ОБЖпа, Максим Иванкин, Азат Чебенев, Артем Краснов тĕрлĕ предметпа малти вырăнсенче палăрнă.

 Эрнере пилĕк кун вĕренеççĕ. Кунне икĕ хутчен вĕри апат çитереççĕ. Украинăри ятарлă çар операцине хутшăнакансен ачисене тỹлевсĕр апатлантараççĕ. Сахал тупăшлă çемьери, тăлăха юлнă, хỹтлĕхе илнĕ çитĕнекен ăру валли те çăмăллăхсем пур.

 Сăмах май çакна та палăртмалла. Иртнĕ çул шкул столовăйĕ республикăри вĕренỹ учрежденийĕсем хушшинчи апатланăва тивĕçлĕ йĕркелессипе иккĕмĕш вырăн йышăннă. Кăçал вара муниципалитет округĕнчи шайра "Чи лайăх столовăй" ята тивĕçрĕ.

 Поварсен ăсталăхĕ пысăк. Эльфия Яраханова çак ĕçре 20 çул ытла, Айгуль Яфизова 6 çул вăй хураççĕ. Кухньăри тирпее Гельсиря Абдрахманова тытса тăрать.

Коллектив "Вĕрентỹ" наци проектне туллин пурнăçа кĕртсе пыма тăрăшать.

Альбина АСТРАХАНЦЕВА