Шупашкарти "Волга" физкультурăпа спорт комплексĕн базинче фитнес-аэробикăпа мала тухассишĕн чемпионат, "Атăл ачисем" республика ăмăртăвĕ, "Çамрăк шанăçсем" ача-пăча спорчĕн фестивалĕ иртрĕ.

80 ытла командăран 800 ытла спортсмен явăçрĕ тупăшăва.

Шупашкартан, çавăн пекех Чулхула облаçĕнчен, Йошкар-Ола хулинчен, Етĕрне, Вăрмар, Сĕнтĕрвăрри муниципалитет округĕсенчен вăйлă командăсем пулчĕç пулин те Патăрьелĕнчи "Паттăр" спорт шкулĕнчи фитнес-аэробика уйрăмĕн пĕрремĕш категориллĕ тренерĕ Татьяна Торговцева ертсе пыракан 4 ушкăн та (28 аэробистка) ăмăртусенче пысăк ăсталăх кăтартрĕç.

"Степ-аэробика" дисциплининче 14-16 çулсенчи "Паттăр ачисем" пĕрремĕш, 11-13 çулсенчи "Грация" команда иккĕмĕш, "Огонек" ушкăн тата 8-10 çулсенчи ỹсĕмрисен "Лидер" виççĕмĕш вырăнсенче пулчĕç.