Юхмапа Пăла тăрăхĕнче ноябрĕн 13-мĕшĕнче Раççей Федерацийĕн Геройĕ, авиацин генерал-лейтенанчĕ Николай Гаврилов ĕçлĕ çул çỹревпе пулчĕ. Николай Федорович Канаш районĕнче çуралса ỹснĕ.

Хăнана муниципалитет округĕн пуçлăхĕ Рудольф Селиванов, тĕрлĕ çар чаçĕнчеслужбăра тăнисем, шкул ачисем Патăрьелĕнчи культурăпа кану паркĕнче кĕтсе илчĕç. Тĕл пулăва çакăнтан пуçлама сăлтавĕ те пысăк - шăпах паркри МИ-2 палăк-вертолета Николай Гаврилов генерал-лейтенант пулăшăвĕпе вырнаçтарнă.

Мероприяти малалла Патăрьелĕнчи пĕрремĕш вăтам шкулта тăсăлчĕ. Унăн директорĕ Наталия Андреева пĕлỹ çурчĕпе паллаштарчĕ. Николай Гаврилов Тăван çĕршывăн Аслă вăрçине тата çак вĕрентỹ учрежденинче ĕçленĕ, вĕреннĕ, Украинăри ятарлă çар операцинче пуçĕсене хунă салтаксене асăнса йĕркеленĕ кĕтес, "Берегиня" музей, Чăваш Республикин паллă çыннисен сăн ỹкерчĕкĕсемпе йĕркеленĕ стендсем ачасемшĕн питĕ кирлине, çакă вĕсен чунĕнче патриотлăх туйăмне çуратнине каларĕ. Çавăн пекех самбистсем, "Зарница" тата "Орленок" çар вăййисене хутшăнакансем, хĕр-параппанçăсен "Грация" ушкăнĕ тата ыттисем те хăйсен пултарулăхне туллин кăтартрĕç.

 Раççей Федерацийĕн Геройĕ кадетсемпе Паттăрлăх урокĕ ирттерчĕ. Пурнăçра кашни професси кирлине, анчах суйласа илнĕ ĕçе чунтан пурнăçламаллине калаçăвĕнче палăртрĕ.

Николай Гаврилов Рудольф Селивановпа пĕрле Патăрьелĕнчи "Арбат" лапамĕнче тĕрлĕ çар чаçĕнче службăра пулнисем вырнаçтарнă палăксем патне те çитрĕ. Юхмапа Пăла тăрăхĕнче çамрăксенче патриотлăх туйăмне вăратассине тимлĕх уйăрассипе лайăх ĕçленине каларĕ.

Ĕçлĕ тĕл пулу чуна хумхантаракан самантпа вĕçленчĕ. Патăрьел муниципалитет округĕн администрацийĕнче округ пуçлăхĕ Рудольф Селиванов тата Раççей Федерацийĕн Геройĕ Николай Гаврилов çавра сĕтел хушшинче ятарлă çар операцине хутшăнакансемпе, хальхи вăхăтра отпуска килнисемпе тĕл пулчĕç. Унти Кивĕ Катекри Елена Кузнецовăна ятарлă çар операцине хутшăнакан Артем ывăлĕ ячĕпе вăл тăракан çар чаçĕн командирĕнчен килнĕ Тав çырăвне пачĕç.

 Рудольф Васильевич Николай Федоровича туслă çыхăнушăн, хисеп туса килнĕшĕн ăшшăн тав тунă май округăн Хисеп грамотине парса чысларĕ.

Ольга ПАВЛОВА