Иртнĕ эрнере муниципалитетра Ял хуçалăхĕнче тата тирпейлекен промышленноçра ĕçлекенсем хăйсен професси уявне анлăн паллă турĕç. Мероприяти Патăрьелĕнчи культурăпа кану центрĕнче йĕркеленĕ куравран пуçланчĕ. Кунта кĕркуннен тулăх кĕрекипе туллин паллашма май пулчĕ. Муниципалитет карттине курма та кăмăллă пулчĕ, ăна хăш территори уйрăмĕнче мĕнле культура ытларах çитĕнтернине пăхса хатĕрленĕ.

Савăнăçлă уява Патăрьел муниципалитет округĕн пуçлăхĕ Рудольф Селиванов, Чăваш Республикин ял хуçалăх министрĕн пĕрремĕш çумĕ Инна Волкова, Чăваш Республикин Патшалăх Канашĕн депутачĕ Валерий Антонов, ял хуçалăх предприятийĕсемпе фермер хуçалăхĕнче ĕçлекенсем, АПК ветеранĕсем тата ытти сумлă хăнасем хутшăнчĕç.

 Ял хуçалăхĕнчи кăтартусемпе Патăрьел муниципалитет округĕн пуçлăхĕн çумĕ - экономика, ял хуçалăх тата инвестици ĕç-хĕл пайĕн начальникĕ Юлия Селиванова паллаштарчĕ. Вăл пĕрчĕллĕ тата пăрçа йышши культурăсен вăтам тухăçĕ пĕр гектартан 29,4 центнерпа танлашнине, çĕр ĕçченĕсем юлашки çулсенче паха вăрлăхсем никĕсе хывассине тимлĕх уйăрнине пĕлтерчĕ. 2024 çулта тыр-пул лаптăкĕн 35 процентне элита вăрлăх акса хăварнă.

Хирсене вăхăтра сухаласа хăварасси, акапа вырмана кĕске вăхăтра вĕçлесси, пахалăхлă выльăх апачĕ янтăласси - пурте техникăпа çыхăннă. 2019 çултан пуçласа кăçалччен туяннă техникăн 40 процентне патшалăх субсидилени парка чылай çĕнетме май панă. Асăннă тапхăрта çĕнĕ 277 трактор, тырă выракан 20 комбайн, выльăх апачĕ хатĕрлекенни - 9, кăкарса çỹрекен хатĕр 750 единица ытла туяннă.

Выльăх-чĕрлĕх отраслĕнчи кăтартусем те начар мар. Округ сĕт суса илессипе республикăра иккĕмĕш, аш-какай хатĕрлессипе виççĕмĕш вырăнсене йышăнать. Сăвăм пĕлтĕрхи çак вăхăтрипе танлаштарсан 1,4, какай туса илесси 15 процент ỹснĕ.

Çулталăк вĕçне ял хуçалăх организацийĕсем пĕр ĕнерен вăтамран 8000 килограмм ытла сĕт суса илме тĕллев лартнă. "Батыревский" пĕрлешỹ тата "Исток" çĕр ĕç фирми 9000 килограмм ытла сăваççĕ.

Муниципалитетра ял хуçалăхне аталантарма патшалăх уйăракан тимлĕх те пысăк витĕм кỹрет. Юлашки виçĕ çулта 84 çын гранта тивĕçнĕ. Хăй тĕллĕн ĕçлекенсене ял хуçалăх продукцине туса илессишĕн тăкакланнăшăн укçа уйăрни те ырă пулăм. 10 уйăхра туяннă 434 ĕнешĕн, 26 единица техникăшăн, 289 ĕнене усранăшăн, хурт-хăмăр валли кирлĕ япаласем туяннăшăн пурĕ 49 млн тенкĕ хыснаран панă.

Туса илнĕ продукцие вырăнтах тирпейлесси те округра вăй илсе пырать. Хальхи вăхăтра Юхмапа Пăла тăрăхĕнче 6 кооперативпа 5 фермер хуçалăхĕ аш-какайран 100 ытла тĕрлĕ хатĕр продукципе çурма фабрикат, сĕтрен 17 тĕрлĕ юр-вар тата 18 тĕрлĕ сыр хатĕрлеççĕ.

Çĕнĕ шухăшсене, тĕллевсене пурнăçлама малашне "Батыревский" агропарк та пулăшĕ. Кунта ĕç вĕрет: электричество, газ, шыв пăрăхĕсене хываççĕ тата ытти те.

Патăрьел муниципалитет округĕн пуçлăхĕ Рудольф Селиванов ял хуçалăхĕнче вăй хуракансене çăмăл мар, ырми-канми ĕçĕшĕн, АПК ветеранĕсене аталану çулĕн никĕсне тĕрĕс суйласа илнĕшĕн тав туса саламларĕ. Çавăн пекех вăл туса илнĕ продукцие вырăнтах тирпейлессипе тата ытларах тăрăшмаллине каларĕ.

Чăваш Республикин ял хуçалăх министрĕн пĕрремĕш çумĕ Инна Волкова республикăри ял хуçалăх кăтартăвĕсемпе паллаштарнă май Патăрьел округĕ малтисен ретĕнче пулнине, грантсем илекенсем йышлине палăртса хăварчĕ. Çавăн пекех Чăваш Республикин Патшалăх Канашĕн депутачĕ Валерий Антонов, тĕрлĕ банк представителĕсем тата ытти сумлă хăнасем те сăмах илчĕç.

Савăнăçлă мероприятинче пысăк кăтартусем çĕнсе илнĕ хуçалăхсене, ĕçре палăрнисене чысларĕç. Патăрьел муниципалитет округĕ Чăваш Республикинчи муниципалитетсем хушшинче ял хуçалăхĕпе ирттернĕ экономика ăмăртăвĕнче иккĕмĕш степеньлĕ диплома тивĕçни кăмăла çĕклет. Раççейри "Ылтăн кĕркунне" куравра та Юхмапа Пăла тăрăхĕнчи ял хуçалăхĕнче ĕçлекенсем палăрнă, медальсемпе таврăннă. Ял хуçалăхĕнче тата тирпейлекен промышленноçра вăй хуракансене ĕçри çитĕнỹсемшĕн Раççей, республика, муниципалитет шайĕнчи Хисеп, Тав хучĕсене парса чысларĕç.

Уява хутшăнакансем Патăрьелĕнчи культурăпа кану центрĕнче вăй хуракансен, шкул ачисенчен йĕркеленĕ пултарулăх ушкăнĕсен юрри-ташшине курса киленчĕç.

Ольга ПАВЛОВА