Шăпах çакăн пек проект пурнăçланать республикăри кашни муниципалитет округĕнче. Ăна Чăваш Республикин Хĕрарăмсен канашĕ йĕркеленипе тытса пыраççĕ. Пăлаçипе Юхма ен тăрăхĕнче те чи хастар та пултаруллă, ĕçчен те тарават пикесем проекта тĕпе хурса Патăрьелĕнчи тĕп библиотекăна пуçтарăнчĕç. Бизнесра, культурăра, медицинăра тата ытти сферăра ĕçлекенсем малашнехи проектсене пĕрле пурнăçлассине сỹтсе яврĕç.

Фестивале хутшăнакансене муниципалитет округĕн пуçлăхĕн социаллă ыйтăвĕсемпе ĕçлекен çумĕ, администрацин финанс пайĕн начальникĕ Светлана Чернова саламларĕ. Вăл муниципалитет округĕн обществăлла пурнăçĕнче хĕрарăмсен ролĕ пысăк пĕлтерĕшлĕ пулнине палăртрĕ.

Фестиваль ĕçне çавăн пекех, Улатăр тата Пăрачкав епархийĕн III округĕн благочиннăйĕ, Патăрьелĕнчи Турă Амăшĕн Державная иконĕ ячĕллĕ чирку настоятелĕ Александр Синяков хутшăнчĕ. Фестивале хатĕрленсе тĕрлĕ тематикăпа куравсем йĕркеленĕ. Наталия Кирилловăпа Светлана Рубцова "Алă ĕçĕн ăстисем" мастер-класс кăтартрĕç. Хуçалăх тирпейлĕ тата çителĕклĕ пурăннине палăртакан пукане ăсталама вĕрентрĕç.

"Ăстасем" лапам ял хуçалăх продукцийĕн выставкипе паллаштарчĕ. Унта хутшăнакансем тĕрлĕ чей тата тăварланă апат-çимĕç тутанма пултарчĕç. "Хĕрарăмсен пĕрлĕхĕ тем те тума пултарать" грант проекчĕпе килĕшỹллĕн йĕркеленĕ "Объективра - ял хĕрарăмĕ" фотопроект та курăмлă. "Асанне арчинчи кĕпе" кĕтесре тĕрлĕ çулхи тумтирпе шулькамасем тăратнă. Вероника Кузнецован мастер-класĕ хĕрарăмсен йăлана кĕнĕ пуçа тăхăнмалли калпакĕсемпе паллаштарчĕ. Фестивале хутшăнакансем вĕсемпе кăмăлтан интересленчĕç.

 "Ял хĕрарăмĕсен аллисене нихăçан та тунсăх пусмасть" илемлĕ кĕнекесен экспозицийĕ те илĕртỹллĕ. "Ырă кĕркунне" çут çанталăк материалĕсенчен хатĕрленĕ алă ĕçĕсен выставки те питĕ шеп.

"Сăкăт ен" фольклор ушкăнĕпе "Сказка" ача сачĕн воспитанникĕсем халăх юррисене шăрантарса уяв илемне кỹчĕç.

Чăваш Енри Хĕрарăмсен канашĕн Патăрьел уйрăмĕнчи çамрăксен пайĕн председательне Ольга Моисеевăна "Хĕрарăмсен пĕрлĕхĕ тем те тума пултарать" проект гранчĕн конкурсне хастар хутшăннăшăн Тав çырăвĕпе чысларĕç.

Фестиваль ял хĕрарăмĕсен ĕçĕ пĕлтерĕшлĕ пулнине, обществăна тивĕçлĕ тỹпе хывнине тепĕр хут аса илтерчĕ. Вăл тĕрлĕ çулхисене пĕрлештерчĕ, пултарулăхне палăртрĕ, çавăн пекех йăла-йĕркепе культура пуянлăхне тытса пынине çирĕплетрĕ.

 Альбина ИВАНОВА