Виçĕ çул каялла В.Дубинин тата С.Капитонов хастарсем тăрăшнипе Аслă Чемен ялĕнче çулсерен Халăх пĕрлĕхĕн кунĕнче мини турнир ирттерме пуçларĕç. Пĕлтĕртенпе ăна Тури Чакă ялĕнче кун çути курнă, Украинăри ятарлă çар операцинче пуçне хунă Александр Софронова халалласа йĕркелеме шутларĕç.

Кăçал турнира уçнă май Аслă Чемен территори пайĕн начальникĕн тивĕçĕсене вăхăтлăх пурнăçлакан Е.Фролова, вăтам шкул директорĕ Н.Адидатова, Сашăн аппăшĕ Светлана, Украинăри ятарлă çар операци ветеранĕ, Шупашкарти кадет корпусĕнче (унта Саша та вĕреннĕ) воспитатель пулса ĕçлекен А.Башмаков офицер паттăр çинчен чи ăшă сăмахсем каларĕç. Ульяновскри 104-мĕш десантпа штурмлакан дивизин рота командирĕн заместителĕ, гварди лейтенанчĕ, пирĕн ентеш, Украинăран кĕске вăхăтлăх отпуска килнĕ В.Латышов çакнашкал турнир ирттернин пĕлтерĕшĕ пысăк пулнине палăртрĕ. Сашăн ашшĕпе амăшне паттăр салтак пăхса çитĕнтернĕшĕн çар çыннисен ячĕпе чĕререн тав турĕ. Çак йĕркесен авторĕ те хỹтĕлев сетки çыхма ялта тата хулара пурăнакан çамрăксене (турнира вĕсем чылайăн килнĕ) тивĕçлĕ пулăшу панăшăн ырлăх-сывлăх сунса çутă малашлĕх сĕнчĕ. Сашăн иккĕмĕш сыпăкри йăмăкĕ, ялти вăтам шкулăн 10 класĕнче вĕренекен А.Макарова пиччĕш çинчен хăй çырнă сăвва чуна витермелле вуласа пачĕ. 9 класс ачисем куракансене илемлĕ ташă парнелерĕç. Тухса калакансем Сашăна яланах асра тытнине пĕлтерчĕç.

Паттăр салтак спортра çитĕнỹсем тунă, спорт туризмĕпе, çăмăл атлетикăпа, дзюдопа туслă пулнă. Вăл ырă кăмăллăхĕпе, сăпайлăхпа палăрса тăнă, лайăх вĕреннĕ. 2022 çулхи раштавăн 22-мĕшĕнче 22 çулхи каччă Тăван çĕршыв ирĕклĕхĕшĕн çапăçса паттăррăн пуçне хунă. Раççей Федерацийĕн Президенчĕн хушăвĕпе килĕшỹллĕн Сашăна Паттăрлăх орденĕ парса чыс тунă, 2023 çулхи пуш уйăхĕн 5-мĕшĕнче вăл çуралса ỹснĕ çурт çине Асăну хăми уçнă.

Турнира иртнĕ çулхи пекех 5 команда хутшăнчĕ. Пĕри тепринчен вăйлăрах вылярĕç футболистсем. Пĕрремĕш вырăна "Ибреси" команда, "Бикшики" иккĕмĕш, "Сидели" виççĕмĕш вырăна тухрĕç. "Чи лайăх тапăнса вылякан", "Чи çамрăк вылякан", "Чи лайăх вратарь", "Чи лайăх хỹтĕлевçĕ", "Чи лайăх бомбардир" ятсене В.Ефремов, И.Макаров, Д.Кузьмин, Ф.Антонов, А.Кириллов çĕнсе илчĕç. Мала тухнисене кубок, грамотăсем парса чыс турĕç. Çĕнтерỹçĕсене тата укçан та хавхалантарчĕç. В.Латышов пĕрремĕш вырăн йышăннă командăна ятарлă парне пачĕ. Ялăн хастар çамрăкĕ, Шупашкарта ĕçлекен В.Дубинин турнира çỹллĕ шайра ирттермешкĕн нумай тăрăшрĕ. Паттăрăн ашшĕпе амăшĕ, икĕ аппăшĕ тата тăванĕсем те ăмăртăва йĕркелеме хутшăнчĕç.

 Юлашкинчен пурте пĕрле пылак чейпе сăйланчĕç.

Надежда КОШЕЛЕВА