Туçа ял библиотекинче "Сывă пурнăç йĕркишĕн" акципе килĕшỹллĕн "Пирус туртни сывлăхшăн сиенлĕ" ятпа çамрăксем хушшинче калаçу ирттернĕ. Сывă пурнăç йĕркине пропагандăласси анлăн сарăлса пыни савăнтарать. Анчах пирус туртакансем çамрăкланни, вĕсен хушшинче хĕрсем пулни тарăн шухăша ярать.

 Сигарет тутлă, ăна туртса пăхсан хăвна лайăх туйма пуçлатăн тесе калаймăн. Пĕрремĕшне туртсанах хăсас килет, пуç çаврăнать, ỹсĕрттерет. Каярахпа вара туртаканăн пырĕ кĕçĕтет, ỹпки пĕçертет, лайăх мар сывлать, кăкăр пỹлĕнет, шăлĕсем, пỹрнисем саралаççĕ, укçа-тенкĕ нумай расхутланать, ỹпке, чĕре чирĕсем пуçланаççĕ. Чăннипе каласан, ку чухне табак туртакан мĕн пулассине лайăх ăнланать. Анчах мĕншĕн-ха ăна тивертет?

Çынсем пирусра киленỹ шыраса мар, туртнă чухне пулакан çыхăнусемшĕн мăкăрлантараççĕ. Çул çитмен ача авторитетлă ашшĕ-амăшне пăхăнса тăманнине çирĕплетесшĕн, пĕр-пĕр компание лекме, ыттисем хăйсен çынни вырăнне хурса йышăнччăр тесе пирус туртма пуçлаççĕ. Çамрăк хĕрсем те çавах тата çепĕççине кăтартасшăн. Çулсем иртнĕ май çак виçесем улшăнаççĕ. Аслисем пирус туртни кăмăл-туйăма контроллеме пулăшнине, унпа пĕрле ăнăçлăх, хăтлăх, лăпкăлăх хуçаланнине пĕлтереççĕ. Сигарет тивертсе яр çеç - кăмăл-туйăм çав тери çĕкленет имĕш. Туртнă май мĕнле шухăшсен ытамне путаççĕ-ха: - никама пăхăнманни тата ỹссе çитĕнни, компание кĕме харсăрланни тата хăйне ушкăн çынни пек туйни, ăнăçлăх, хăтлăх кỹртни, чунра лăпкăлăх хуçаланни, шухăшпа йĕркелесе пыни, хăвна чăн-чăн арçын пек туйни, мĕнле те пулин ĕçе вĕçлени, вăхăта ирттерни, хăвăн ăнăçлăхна кăтартас тени тата ытти те.

 Енчен те эсир туртма пăрахас тетĕр? Психологсем çапла сĕнеççĕ: чи малтанхи пирус туртнă вăхăтсене аса илмелле мар. Халĕ вара шухăшлăр: хăвăрăн сывлăхăра çак сиенлĕ майпа пĕтерме юрать-и? Вăхăта ирттермелли урăх пулăмсем çук-им? Суйлăр. Хăшĕ вырăнлăрах.

Галина КУЗНЕЦОВА, Туçари врач амбулаторийĕнчи медицина сестри