Тренер-преподаватель пулса ĕçленĕ Иван Рыбкинпа Николай Петрова асра тытса Турханта ирĕклĕ майпа кĕрешес енĕпе йăлана кĕнĕ турнир иртнĕ. Кăçалхипе вăл вуннăмĕш хут пулнă.

Ăмăртăва 100 ытла спортсмен явăçнă. Ăна уçнă çĕре муниципалитет округĕн пуçлăхĕн пĕрремĕш çумĕ, администрацин строительство, çул-йĕр хуçалăхĕпе тирпей-илем управленийĕн начальникĕ Равиль Ямалетдинов, Турхан территори пайĕнначальникĕ Алина Антонова, Чăваш Республикин физкультурăпа спортăн тава тивĕçлĕ ĕçченĕ Владимир Семенов мăшăрĕпе, Раççей спорт мастерĕ, Раççей шайĕнчи категориллĕ судья Сергей Семенов, Иван Антонович мăшăрĕ Анисия Рыбкина тата ыттисем хутшăннă.

Сăмах илекенсем Иван Антоновичпа Николай Петрович округри спорт аталанăвне тивĕçлĕ тỹпе хывнине палăртнă. Вĕсен тăрăшулăхĕ, ĕçе парăнни нумай çамрăка спорта явăçтарнă, пысăк çитĕнỹсем тума хавхалантарнă. Уйрăммăн çакна та палăртмалла, Иван Рыбкин Турханти вăтам шкулта пуçласа ирĕклĕ майпа кĕрешекенсен ушкăнне те уçнă.

Малалла ăмăртусем пуçланнă. Кам техникăна пĕлнипе, кам татăклă йышăну тума пултарнипе кĕрешỹре çĕнтерỹçĕ пулнă. Вĕсен питĕнче савăнăç çиçнĕ. Кĕрешекенсене куракансем хавхалантарса тăнă.

Альбина ИВАНОВА