Çак кунсенче çеç Шупашкар тата Чăваш митрополичĕн Савватий пиллĕхĕпе республикăра тухса тăракан "Ырă хыпар" журналăн 100-мĕш номерне алла илсе вуларăмăр. Унăн тĕп редакторĕ - Раççей Журналисчĕсен союзĕн членĕ, филолог, филологи наукисен кандидачĕ Вера Савельева.

Вера Мефодьевна Турра ĕненекенсене, чиркĕве çỹрекенсене чăнласах та ырă хыпарпа, çамрăксене, ыттисене те православи тĕн йăли-йĕркипе паллаштарас тĕллевпе мĕн пур вăй-халне, ăс-тăнне хурса тăрăшать. Эпир журналăн кашни номерне чăтăмсăррăн кĕтетпĕр, кашни хыпарне сиктермесĕр вулатпăр. Уйрăмах пире ăса, ырăпа усала уйăрма вĕрентсе çырнă калавсем, пачăшкăсен тĕрлĕрен хуравĕсем, кил-тĕрешре усă курмалли сĕнỹсем тата ытти те килĕшет.

Юхмапа Пăла тăрăхĕнче ăна почта урлă çырăнса илекенсем те пур. Журнала алла тытса вулас текенсене вырăна та çитерсе паратпăр. Патăрьелĕнчи Александр Невский ячĕллĕ чиркỹ урлă çеç "чун апачĕ" 70 ытла экземпляр саланать.

Хĕрарăм чăнласах та кирек мĕнле ĕçре те хăйĕн пултарулăхне кăтартма, халăхшăн пархатарлă ĕç тума тума пултарать. Вĕсенчен пĕри - "Ырă хыпар" журнал редакторĕ Вера Савельева. Эпир ăна чиркĕве çỹрекенсем, журнала чун-чĕререн юратса вулакансем Анне кунĕ ячĕпе ăшшăн саламлатпăр, малашне те творчество каçалăкĕнче пысăк çитĕнỹ тума, журнала тата кăсăкларах кăларма ăнăçу сунатпăр.

Луиза Лисицына, Патăрьел ялĕ