Шупашкарти "Волга" стадионта республикăри массăллă информаци хатĕрĕсенче тăрăшакансем хушшинче Пĕтĕм Раççейри "Ĕçпе хỹтĕлеве хатĕр" физкультурăпа спорт комплексĕн пĕрремĕш фестивалĕ иртрĕ.

Спорт мероприятине 24 команда чысне хỹтĕлекен 100 ытла сотрудник хутшăнчĕ. Сывă пурнăç йĕркине кăмăллакансене Чăваш Ен Пуçлăхĕ Олег Николаев, Чăваш Республикин цифра аталанăвĕпе информаци политикин тата массăллă коммуникацисен министрĕ Владимир Степанов, Чăваш Республикин физкультурăпа спорт министрĕ Василий Петров тата ытти сумлă хăнасем саламларĕç, çитĕнỹсем сунчĕç.

 "Çакнашкал фестивальсем çынсене спортпа туслашма пулăшаççĕ. Эсир, журналистсем, хăвăр тĕслĕхпе вулакансемпе куракансене, итлекенсене хастартарах пулма хистетĕр. ГТО комплексне пурнăçлас тĕлĕшпе кăçалхи виççĕмĕш квартал пĕтĕмлетĕвĕпе пирĕн республика Раççейре саккăрмĕш, федерацин Атăлçи округĕнче пĕрремĕш вырăнта. Шансах тăратăп, çак фестиваль хыççăн рейтинг татах та ỹсĕ", - терĕ Олег Алексеевич.

 Аса илтеретпĕр, ГТО комплексĕ "Демографи" наци проекчĕн "Спорт-пурнăç йĕрки" проекчĕн уйрăлми пайĕ шутланать. Унăн тĕллевĕ - 2030 çул тĕлне çĕршыври мĕн пур халăхăн 70 процентне физкультурăпа тата спортпа туслаштарасси.

"Авангард" хаçат ĕçченĕсем те спорт мероприятийĕнчен пăрăнса юлма пултараймарĕç. Пурте пĕрле ГТО нормисене пурнăçлама тăрăшрăмăр. Фестивале Патăрьел муниципалитет округĕн пуçлăхĕ Рудольф Селиванов та хутшăнни пире тата та хастартарах пулма хистерĕ, вăй парса пычĕ.

Александр ИВАНОВ