Нăрваш Шăхаль, Çĕньял, Тури Туçа ялĕсенчи почта çыхăну уйрăмĕсенче юсав ĕçĕсем иртесси пирки эпир хаçатра пĕлтернĕччĕ ĕнтĕ. Ырă пулăм "Раççей почти" акционерла пĕрлешĕвĕн почта çыхăну уйрăмĕсене юсамалли тата çĕнетсе улăштармалли программăпа килĕшỹллĕн, РФ Президенчĕн хушăвĕпе пурнăçланать.

Çак кунсенче Патăрьел муниципалитет округĕн пуçлăхĕ Рудольф Селиванов тата "Раççей почти" акционерла пĕрлешĕвĕн Чăваш Республикинчи почта çыхăнăвĕн управленийĕн директорĕ Максим Ладилов çỹлерех асăннă уйрăмсенче пулчĕç. Юсав ĕçĕсем вĕçленнĕпе пĕрех. Пур çĕрте те таса, çутă, илĕртỹллĕ. Клиентсене йышăнмалли залсем тирпейлĕ, хăтлă. Раççей почти сĕнекен таварсене курăмлă вырнаçтарнă. Уйрăмсенче тăрăшакан ертỹçĕсен ĕç опычĕ пысăк. Вĕсем умма лартнă тĕллевĕсене пурнăçлаççĕ. 2025 çулхи пĕрремĕш çур çул валли çырăнтару кампанийĕ пынă май, халĕ шăпах çак ыйтăва мала хураççĕ. Кашни уйрăмрах районти "Авангард" хаçата çырăнтарасси ăнăçлă пынине палăртрĕç.

 Почта уйрăмĕсенче ĕçлекенсем Юхмапа Пăла тăрăхĕн халăхне патшалăхăн тĕрлĕ пулăшăвĕпе тивĕçтереççĕ. Хаçат-журнал, çыру, пенси, пособи укçисене валеçеççĕ, электричествăпа, газпа усă курнăшăн татăлаççĕ. Рецептсăр сутакан эмелсене те туянма пулать.

 Юсав хыççăн çĕнелнĕ уйрăмсенче тулли кăмăлпа ĕçлеме тивĕçлĕ услови туса панăшăн тем пекех хĕпĕртеççĕ вĕсем.

Альбина АСТРАХАНЦЕВА