РФ ШĔМĕн муниципалитетсем хушшинчи "Батыревский" уйрăмĕн яваплă службисенчен пĕри - участокри уполномоченнăйсем. Вĕсен тĕп тĕллевĕ - муниципалитет округ территорийĕнчи обществăлла йĕркелĕхе сыхласси, çынсене хăрушсăрлăхпа, тăнăçлăхпа тивĕçтересси, граждансен ыйтăвĕсене вăхăтра тата кирлĕ пек татса парасси, вĕсемпе профилактика калаçăвĕсем йĕркелесси тата ытти те.

Нумай пулмасть вĕсем хăйсен професси уявне, Раççейре полицин участокри уполномоченнăйсен службине туса хуни иккĕмĕш ĕмĕре кайнине, 101 çул тултарнине паллă турĕç. Кунта шăпах хăйсен ĕçне тỹрĕ чунпа пурнăçласа пыракансене те каласа хăварчĕç. Акă, Патăрьел территори уйрăмĕшĕн яваплă Алексей Шакаев, Шăнкăртам территори пайĕнче йĕркелĕхпе тивĕçтерсе тăракан Раиль Миначев полици капитанĕсем хăйсен тивĕçне тỹрĕ кăмăлпа пурнăçланине палăртмалла.

 Полицин аслă лейтенанчĕ Алмаз Юнусов пирки уйрăммăн та палăртса хăварас килет. Алмаз Альбертович Алманчă, Кзыл Чишма,Тутар Сăкăт, Сăкăт территори пайĕсенчи йĕркелĕхпе тăнăçлăхшăн яваплă. Çамрăк участковăй ултă ял халăхĕпе пĕр чĕлхе тупса ĕçлет. Оперативлă служба ĕçĕ-хĕлĕнчи çитĕнỹсемшĕн вăл "Районти чи лайăх участокри уполномоченнăй" хисеплĕ ята тивĕçнĕ. Республикăри "Халăх участковăйĕ" конкурса хутшăнса аслă лейтенант виççĕмĕш вырăн йышăнни те вăл хăйĕн çăмăл мар ĕçне кăмăлтан пурнăçласа пынине çирĕплетет.

Административлă участоксемшĕн яваплă Федор Анюровпа Алмаз Юнусов полици лейтенанчĕсен ĕçне те палăртмалла. Федор Анатольевич Аслă Чемен, Шăхач, Турхан территори пайĕсенчи 8, Алмаз Рестямович Туçа, Çĕнĕ Ахпỹрт территори пайĕсенчи 9 ял халăхĕпе ĕçлеççĕ, вĕсенчи йĕркелĕхшĕн, тĕрлĕрен пăтăрмахсене сирсе ярассишĕн тăрăшаççĕ.

 - Хальхи вăхăтра пирĕн участоксенчи уполномоченнăйсем пĕчĕк йышпах пысăк ĕç туса пынине палăртмалла. Службăра участковăйсем çитменрен (кăмăл пуррисем çак ĕçе вырнаçма пултараççĕ, ваканси пур) вĕсен кашнинех тата хушма территори пайĕсем те пур. Первомайски, Нăрваш Шăхаль, Çĕньял, Ишлĕ, Пăлапуç Пашьел, Пикшик, Тăрăн, Ыхра Çырми территори пайĕсенче шăпах вĕсем пĕрлехи вăйпа йĕрке туса тăраççĕ - пĕлтерчĕ участокри уполномоченнăйсен начальникĕ Ильдус Козлов.

Альбина НИКОЛАЕВА