Чăваш халăхĕн культура еткерлĕхне упрас тата аталантарас тĕллевпе Патăрьелĕнчи культурăпа кану центрĕнче хăй тĕллĕн вĕреннĕ театр ăстисен коллективĕсен республикăри "Асамлă чаршав" фестиваль-конкурсĕ иртнĕ. Ăна Чăваш Енри пĕрремĕш колхоз театрне йĕркеленĕренпе 90 çул çитнине халалланă.

 Унта хутшăнма 25 ушкăн кăмăл тунă. Гала-концертра вара сцена çине Патăрьел, Вăрнар, Йĕпреç, Муркаш, Красноармейски, Шупашкар, Çĕмĕрле муниципалитет округĕсенчи 8 коллектив тухнă.

 Конкурса театр ăсталăхĕн тĕрлĕ жанрĕпе калăпланă спектаклĕсене (сыпăкĕсене) тăратнă.

Патăрьел халăх театрĕ (режиссерĕ Чăваш Республикин культурăн тава тивĕçлĕ ĕçченĕ Луиза Леонтьева) тỹресемпе куракансен умне Александр Кăлканăн "Анисса" драмин сыпăкне кăларнă. Коллектив "Чи лайăх драматурги тата ăна сцена çинче пурнăçа кĕртни" номинацин иккĕмĕш степеньлĕ лауреат дипломне тивĕçнĕ.

 Альбина ИВАНОВА