Патăрьел муниципалитет округĕнче тĕрлĕ наци çыннисен культурипе йăли-йĕркине малалла тăсас, халăхăн туслăхне тата ытларах çирĕплетес тĕллевпе йĕркелекен мероприяти сахал мар. "Кинофильмсенчи юратнă юрăсемпе ташăсем" фестиваль-конкурс шăпах вĕсенчен пĕри. Кăçал ăна Патăрьелĕнчи культурăпа кану центрĕнче апрелĕн 4-мĕшĕнче ирттереççĕ. Раççейри Тăван çĕршыв хỹтĕлевçин, Чăваш Енри Çĕнтерỹпе патриотизм çулталăкĕсене халалланă мероприяти 18 сехетре пуçланать.

 Фестиваль тĕллевĕ - çынсен тĕрлĕ енлĕ творчество пултарулăхне аталантарасси, талантсене тупса палăртасси, çитĕнекен ăрăва, çамрăксене патриотла, ăс-хакăл тĕлĕшĕнчен воспитани парас тĕлĕшпе ырă йăласене упраса хăварасси, коллективсен пултарулăхне, пĕрлĕхне ỹстересси, тĕрлĕ вăхăтри кинофильмсенчи юрă-кĕвĕпе çывăх паллашасси тата ытти те.

Сцена çинчи юрă-ташă тупăшăвне Патăрьелĕнчи мĕн пур харпăрлăх формиллĕ организаци-предприяти коллективĕсем хутшăнаççĕ. Фестиваль условийĕпе килĕшỹллĕн унта хутшăнакансен совет тата Раççей кинофильмĕсенчи юрă-ташша суйласа илсе (5 минутран ытлашши мар) ăна пысăк ăсталăхпа кăтартмалла. Пĕр организаци темиçе номинаципе те сцена çине тухма пултарать. Инструментпа выляс ăсталăха кăтартни, "вокал" (12 çынран кая мар хор, 4 е ытларах çынлă ансамбль, трио, дует, солистсем), "хореографи".

Конкурса хутшăнакансен заявкăсене Патăрьелĕнчи культурăпа кану центрне мартăн 28-мĕшĕччен тăратмалла.