Сăкăт территори пайĕнче яла тирпей-илем кĕртес тĕлĕшпе кĕркуннехи субботниксем тăтăшах йĕркелеççĕ. Чăн малтанах вĕсем кану паркĕн территоринчи хыт-хурана, ытти ăпăр-тапăра тасатма кар тăнă. Акă мĕн пĕлтерчĕ хаçат редакцине кун пирки Сăкăт территори пайĕн начальникĕ Вероника Кузнецова:

- Сăкăтри вăтам шкул Патăрьелĕнчи халăха ĕçпе тивĕçтерекен центрпа ачасене вăхăтлăх ĕçе явăçтарма килĕшỹ тунă. Çавăнпа та кашни кунах 9 класра вĕренекен пилĕк ача уроксем хыççăн пĕр сехетлĕхе обществăлла территорисене тирпей-илем тума хутшăнать. Çак кунсенче çеç администраци, культура ĕçченĕсем "Раççей шывĕ" акцие хутшăнса паркри кỹлĕ таврашне тасатрăмăр. Ачасем те кăмăлтан ĕçлерĕç. Халĕ пирĕн тĕп тĕллев - хамăр пурăнакан тавралăха, обществăлла вырăнсене тирпейлесе хăтлăх кỹресси, унта та кунта ỹссе кайнă вĕренесене тасатасси. Субботниксенче техникăпа "Красное Знамя" ЯХПК ертỹçи Петр Никифоров пулăшать. Çанталăк типĕ те уяр чухне тирпей-илемпе çыхăннă мероприятисене малалла та йĕркелесшĕн.

Альбина НИКОЛАЕВА