ШУПАШКАР тата Чăваш Митрополичĕ Савватий пиллĕхĕпе республикăра виçĕ çул каялла Турра ĕненекенсем валли уйăхра пĕр хутчен тухса тăракан "Ырă хыпар" (тĕп редакторĕ Вера Савельева) журнал кун çути курчĕ. Чиркĕве çỹрекенсем, православи тĕнне ĕненекенсем "чун апачĕн" черетлĕ номерĕ пиçсе тухасса чăтăмсăррăн кĕтеççĕ. Ноябрь уйăхĕнчи кăларăмра Улатăрпа Пăрачкав епархийĕн III округ благочиннăйĕ, Тури Туçари çветтуй Троица ячĕллĕ чиркỹ настоятелĕ Николай Марков протоиерей пурнăçĕ, ĕçĕ-хĕлĕ, район чиркĕвĕсен аталану çул-йĕрĕ пирки вуласа пĕлме пулать. "Турă пире çынсемпе ĕçлесе пурăнма пилленĕ пулсан вĕсемшĕн йăлтах тумалла...",-тет вăл вулакана тăватă çул благочиннăйĕн çăмăл мар тивĕçне пурнăçлакан Николай атте.