ХАЛЬХИ вăхăтра лăпкă та тăнăç пурнăçа пăтраштаракансем, террористсен ирсĕр ĕçĕсем пирки массăллă информаци хатĕрĕсенче сахал мар çыраççĕ, кăтартаççĕ. Çĕршыв хăрушлăхĕ шутланакан усал пулăмран яланах сыхă тăмалла. Ку тĕлĕшпе çакна та палăртса хăвармалла: теракт пирки суйса хыпарлакансенчен чылайăшĕ шỹт вырăнне хураççĕ. Вăл вара шỹт, ултав мар, преступлени! Ăссăрла хăтланушăн "телефон террорисчĕсене" 10 çуллăха ирĕкрен хăтарма та пултараççĕ. Çын пурнăçĕпе, обществăшăн хăрушлăх кăларса тăратассипе çыхăннă преступленишĕн çакă чи çирĕп айăплав шутланать.