Патӑрьел муниципалитет округӗ республикӑра яланах кӑтартуллӑ та паллӑ спортсменсемпе уйрӑлса тӑнӑ. Юлашки ҫулсенче вара пирӗн ентешсем Раҫҫей, тӗнче шайӗнче палӑрни, хӑйсен кӑтартӑвне ҫӗнетни тата ытларах савӑнтарать. Акӑ, юлашки виҫӗ эрнере ҫеҫ Эльвина Сафина юнионерсем хушшинче армспортпа йӗркеленӗ пысӑк ӑмӑртура тӗнче чемпионки пулса тӑчӗ. Иван Матросов та ветерансем хушшинче тӗнче шайӗнче грекла-римла кӗрешсе ылтӑн медале ҫӗнсе илчӗ!

Кӑшт маларах "Паттӑр" спорт шкулӗн спортсменӗсем Ильшат Купкеновпа Булат Тукмаков хӑйсен виҫисемпе Мускавра корэш енӗпе иртнӗ тӗнче кубокӗн ӑмӑртӑвӗнче палӑрса ылтӑн тата пӑхӑр медальсене тивӗҫнӗччӗ.

Ентешӗмӗрсен спорт каҫалӑкӗнчи пысӑк ҫитӗнӗвӗ пуриншӗн те ырӑ тӗслӗх.