Апрелĕн 13-мĕшĕнче ирхине Шупашкарта Атăл хĕрринче Чăваш Республикин Правительствин министрĕсем, патшалăх органĕсен ертÿçисем тата муниципалитет пĕрлĕхĕсен пуçлăхĕсем "Чăваш Ен территорийĕнче наци проекчĕсене пурнăçа кĕртесси" форум ĕçне хутшăнма пуçтарăннăскерсем  физзарядка ирттернĕ. Пĕрлехи тренировка сывă пурнăçшăн кар тăнине, киревсĕр йăла-йĕрке ют пулнине кăтартса парать.

Кунта час-часах республикăри ĕç коллективĕсем уçăлса çÿренине курма пулать. Акă, ирхи физзарядкăна та Чăваш ял хуçалăх академийĕн студенчĕсемпе преподавателĕсем хутшăннă.

Чăваш Республикин Пуçлăхĕ Михаил Игнатьев Атăл хĕррине велосипедпа ярăнма тухнă май физзарядкăна пухăннисене сывă пурнăç йĕркине тытса пынăшăн тав тунă. Михаил Васильевич палăртнă тăрăх çакнашкал тĕл пулусем пĕрлехи ыйтусене татса пама пулăшнипе пĕрлех пĕр командăра ĕçлес туйăмсене аталантарассинче те пысăк вырăн йышăнаççĕ.

А. Иванов