ÇĔНТЕРỸ кунне район центрĕнче çеç мар, кашни ял тăрăхĕнчех чыслăн та сумлăн ирттерсе яма, вăрçă ветеранĕсемпе тыл хастарĕсене, салтак арăмĕсене саламлама хатĕрленеççĕ. Майăн 9-мĕшĕнчех районта тĕрлĕрен спорт ăмăртăвĕ те ирттерме палăртнă. Вĕсенчен чи пысăкки тата пĕлтерĕшли - юрха (рысистые) утсем старта тăни, çуллахи сезона уçни. Акатуй-Сабантуй иртекен "Хĕвеллĕ" уçланкăра старт илме хатĕрленекен урхамахсем сахалăн мар, 33-ĕн пулаççĕ. Яланхиллех Патăрьелсен вăйлă юрха лашисемпе юнашар Тутар Республикинчи Пăва районĕнчен, Чĕмпĕртен килнĕ спортсменсем те тупăшĕç. Спортăн çак енĕпе "чирлисем" митинг хыççăн лашасем чупнине курма уçланкăна кайма пултараççĕ.