Май уйăхĕн виççĕмĕш вырсарникунĕнче Пĕтĕм тĕнчери СПИД чирĕнчен вилнисене асăнмалли кун. Çак амакран пирĕн районта 5 çын вилнĕ.

Хальхи вăхăтра 35 çын (республикăра - 2305) врач патĕнче учетра тăрать. Чирлисем чылай ялта тенĕ пекех пур. Ытларахăшĕ вара Патăрьел, Сăкăт, Шăнкăртам, Турхан, Треньел, Упамса ялĕсенче. Чирлĕ амăшĕсенчен 4 ача ВИЧпа çурални те шухăша ямалла.

Хăрушă чиртен сипленмелли эмел çук. Хăвăрт сарăлма пултарать. Пуçласа ăна 1981 çулхи июнĕн 5-мĕшĕнче СШАра тупса палăртнă. Унтанпа вăл çĕр чăмăрĕн пысăк пайне çитнĕ. Çуллен пиншер çын вилни те шухăша ямаллах. Мĕнле кĕрешмеллине те пĕлмеççĕ.

ВИЧ инфекцийĕ çынра нумай çул пурăнма пултарать. СПИД стадине çитиччен 7 - 15 çула та капашать.

Вирус этем организмне ар çыхăнăвĕ урлă лекме пултарать. Юн тăрăх каясси наркотикпа çывăхланнисем пĕр шприцпа, фильтрпа, савăтпа, йĕппе усă курнинчен те килет. Татуировка тунă чухне стерилизацилемен инструментсемпе, сухал хырнă май пĕр станокпа ыттисем усă курни хăрушлăх кăларса тăратĕ. Çынна тепĕр çыннăн юнне янă, органĕсене улăштарса лартнă чухне те вирус лекес хăрушлăх пур. Инфекциллĕ амăшĕ ачине çуратиччен те, кăкăр ĕмĕртнĕ чухне те чир ертме пултарать.

Чиртен асăрханас тесен пĕлнĕ-пĕлмен çынпа ар çыхăнăвне кĕме ан тăрăшăр. Пахалăхлă презервативсем кирек ăçта та сутаççĕ. Татуировка тутарнă чухне йĕпсем, чернил яракан савăтсем уйрăм пулччăр. Ỹт е суран çине инфекциллĕ юн лекес пулсан кранран юхса тăракан шывпа, супăньпе çуса тасатăр. Çийĕнчех врач патне çул тытăр. Сывă пурнăç йĕркине мала хурăр. Сăра-эрехпе наркотика сивлеме пĕлĕр. Пирĕн сывлăх, пирĕн малашлăх пĕр хамăртан çеç килет.

Çавăнпа та иккĕленỹ çуралсан районти тĕп больница поликлиникинче анализсем пама (тỹлевсĕр) пултаратăр. Шанăç телефонĕ - 6-18-93 - те ĕçлет.

А. ЧЕРНОВА, районти тĕп больницăн врач-инфекционисчĕ