МАЙĂН 1-мĕшĕнчен пуçласа республикăра пушара хирĕç кĕрешмелли ятарлă режим кăларнă пирки хаçатра пĕлтернĕччĕ. Çак кунтан вăрманта кăвайт чĕртме, пурăнакан вырăнтан аякра мар типĕ курăк çунтарма юрамасть. Шел пулин те, йĕркене пăхăнман çынсем тупăнаççĕ. Ку таранччен республикăра административлă право йĕркине пăсни çинчен калакан РФ Кодексĕн 20.4 статйипе килĕшỹллĕн пушар тухасран сыхланмалли режима пăснăшăн 42 гражданина айăпланă.

Хура списока çакланнисен хушшинче пирĕн район çыннисем çук. Анчах та çакă малашнехи яваплăхран хăтармасть. Çанталăк вăхăтлăха сулхăнлатса илчĕ пулин те, шăрăх та типĕ çу кунĕсем умра. Çавăнпа та тепĕр хут аса илтеретпĕр. Вут-кăварпа çыхăннă инкекшĕн пурин те саккунпа килĕшỹллĕн самай тăкакланма тивет: ятарлă режимри инкекшĕн уйрăм çынсен 2 - 4 пин, должноçрисен 15 - 30 пин, индивидуаллă предпринимательсен 30 - 40 пин, юридика пĕлтерĕшлисен 200 - 400 пин тенкĕ штраф тỹлеме тивет.