Республикăн тĕп хулинчи «Шупашкар-Арена» пăр керменте федерацин Атăлçи округĕнчи тата Китай Халăх Республикинчи КХР Турипе Вăта Янцзы юхан шывĕн хутлăхĕнчи регионсене пĕр-пĕринпе çыхăнса ĕçлеме пулăшакан канашăн виççĕмĕш ларăвĕ иртнĕ.

Унта канаш членĕсем, федерацин Атăлçи округĕнчи регионсен ертÿçисем, çĕршывăн ĕç тăвакан патшалăх органĕсен тата организацийĕсен канаша кĕрекен представителĕсем хутшăннă.

Ларăва канашăн çум председателĕ, Раççей Президенчĕн федерацин Атăлçи округĕнчи тулли полномочиллĕ представителĕ Игорь Комаров уçнă. Вăл Атăлçи округĕшĕн экономикăпа суту-илÿри тата инвестици хывас ĕçри хутшăнусем уйрăмах пысăк пĕлтерĕшлине палăртнă. 13 проект /ял хуçалăхĕ, апат-çимĕç, стройматериал, машина, оборудовани, вăрман касса йывăç хатĕрлесси, логистика тата ыт. те/ — чи малтан пурнăçа кĕртмелли программăсен шутĕнче. Атăлçи округĕнчи регионсем Янцзы провинцийĕсемпе, федераци шайĕнчи хуласемпе пĕрле ĕçлесе 57 проекта пурнăçа кĕртесшĕн.

Канашăн çум председателĕ, КХР Патшалăх Канашĕн членĕ Ван Юн форума Шупашкарта çÿллĕ шайра ирттерессишĕн тĕплĕн хатĕрленнĕшĕн, хăнасене ăшшăн кĕтсе илнĕшĕн Раççей представителĕсене тав тунă. Чăваш Ен тата Турипе Вăта Янцзы тăрăхĕнчи регионсемпе еплерех çыхăнса ĕçлени, хутшăнусен аталану пуласлăхĕ çинчен Чăваш Республикин Пуçлăхĕ Михаил Игнатьев пĕлтернĕ.

Ларăвăн иккĕмĕш пайне Раççей Президенчĕн федерацин Атăлçи округĕнчи тулли полномочиллĕ представителĕн заместителĕ Олег Машковцев тата КХР ют çĕршыв ĕçĕсен министрĕн пулăшуçи Лю Сяньфа ертсе пынă. Тĕпрен илсен, унта хутшăннисем «Атăл-Янцзы» форматăн икĕ çĕршыва усă паракан ырă енĕсене тĕрлĕ енчен тишкерсе тухнă, хутшăнусене малашне тата лайăхлатма май паракан çул-йĕре палăртнă.

А. Иванов