ТЕМИÇЕ кун каялла Вăрманхĕрри Шăхалĕнче тырă склачĕ текен кивĕ хуралтă çунса кайнă. Сăлтавĕ - ачасем вут тивертмелли хатĕрпе ашкăнни. Каçхине ултă сехетсенче вуннăри икĕ арçын ача çак пушă склада кĕнĕ. Вĕсенчен пĕрин аллинче (хуларан килнĕ) зажигалка пулнă. Шельмă ачи унпа выляма хăтланнă курăнать... Юрать-ха, хăйсем тĕтĕмпе чыхăнса шар курман. Районти пушар надзорĕнчен пĕлтернĕ тăрăх, паянхи куна районта 24 пушара шута илнĕ. Иртнĕ çулхи çак вăхăтринчен 60 процент ытларах. Вут-кăварпа çыхăннă инкекре икĕ çыннăн пурнăçĕ татăлнă.