ТĂВАН çĕршывăн Аслă вăрçинче Çĕнтерỹ тунăранпа 75 çул çитнĕ ятпа кăçал пуçласа "День Победы" юрă пирĕн республикăра чăвашла янăрарĕ. Юрий Сементер поэт куçарнă юрра çынсем онлайн мелĕпе пĕчченшерĕн те, ушкăнпа та питĕ хитрен шăрантарчĕç. Çĕнтерỹ парадне паллă тума хатĕрленекен Республика кунĕнче, çĕртмен 24-мĕшĕнче, эпир ăна пĕрре мар итлесе киленĕпĕр. Çакна та палăртса хăварас килет. Пĕлтерĕшлĕ творчество ĕçне, Владимир Харитонов сăввипе Давид Тухманов кĕвĕленĕ юрра тăван чĕлхепе куçарас ĕçе, пирĕн ентешсем те хастар хутшăнчĕç. Çавна май паллă чăваш сăвăçи, Кивĕ Ахпỹрт чиперкки Марина Карягина тележурналистпа Кивĕ Катек поэчĕ Валерий Раштавăн куçарăвĕпе юрра шăрантаракансем те чылайăн. Сăмах май каласан, Аслă Çĕнтерỹ гимнĕ шутланакан юрра тутарла тата ытти чĕлхепе те кăмăлтан юрлаççĕ.