Районти хушма пĕлỹ паракан "Ачасемпе çамрăксен спорт шкулĕ - "Паттăр" ФСК" автономи учрежденийĕнче кăçал юсав ĕçĕсене пурнăçласа шыва кĕмелли аслисен бассейнне, фитнес-зала, душ кабинисене, ытти пỹлĕмсене тĕпрен çĕнетрĕç. Çакна валли республика бюджетĕнчен уйăрнă 4 миллион, район бюджетĕнчен 300 пин ытла тенкĕпе усă курнă. Перекетленĕ укçа-тенкĕпе кĕрешекен зала, ыттисене сăн кĕртесшĕн. Патăрьел ял тăрăхĕ спорт комплексĕ умне "Хальхи хула хăтлăхĕ" программăпа килĕшỹллĕн тирпейленĕ.

Капиталлă юсав ĕçĕсем Чăваш Республикин Пуçлăхĕн 2019 çулхи сентябрĕн 26-мĕшĕнче йышăннă "Чăваш Енре пурăнакансен пурнăç пахалăхне лайăхлатмалли хушма мерăсем" хушăвĕпе килĕшỹллĕн пурнăçланчĕç. Маларахри çул шывпа, ăшăпа тивĕçтерекен системăсене юсанăччĕ, электромонтаж ĕçĕсене тунăччĕ.

Спорта аталантарас енĕпе ĕçлессине мала хураççĕ районта. Шăнкăртамри пĕрремĕш вăтам шкул çумĕнче виçĕ хутлă хушма çурт çĕкленет. Ăна килес çул хута яма палăртнă. Халĕ строительство ĕçĕсем пыраççĕ. Кунта та хăтлă спортзал пулмалла.

Патăрьелĕнчи Мичурин урамĕнче И. Рубцова индивидуаллă предприниматель пулăшăвĕпе 3 уйăхра 2,5 миллион тенкĕлĕх универсаллă спорт площадки хута янине те ырламалла. Унта трибуна, мини-футбол хапхи пур. Баскетболла вылямалли условисем тивĕçтереççĕ. Тротуара юсанă. Территорие тирпей-илем кỹртнĕ.

А. Иванова

 Хаклав:

Сергей Шадиряков, Патăрьел ял старости, ĕç ветеранĕ.

- Ял условийĕнче çакнашкал хăтлă физкультурăпа спорт комплексĕ пуррине ырламаллах. Юсав ĕçĕсем хыççăн вăл тата та илĕртỹллĕ. Кунта ачасем те, çамрăксем те, аслă çулхисем те бассейнсене шыва кĕме çỹреççĕ. Ытти залсенче хул-çурăма тĕреклетмелли, кĕрешỹ мелĕсене хăнăхмалли условисем те тивĕçтереççĕ.