Николай Тинюков, Патăрьел районĕн пуçлăхĕ, район тĕп больницин тĕп тухтăрĕ:

- Раççей Президенчĕ Владимир Путин пресс-конференцие пурне те пăшăрхантаракан ыйтуран, короновирус чирĕнчен пуçланчĕ. Журналистсем пĕрин хыççăн тепри пандемие парăнтарассине, унăн малашлăхĕ халăх пурнăçне витĕм кỹнипе кăсăкланчĕç: чир экономикăна мĕнле хавшатни, производство чакни, онлайн-вĕрентỹ ачасен пĕлỹ шайне чакарма пултарни, аптекăсене эмелпе тивĕçтересси, коронавируспа чирлисене медицина препарачĕпе тỹлевсĕр пулăшасси, чиртен асăрханса прививка тутарасси, вакцинăсен пĕлтерĕшĕ тата ытти те.

Çынсен сывлăхĕпе, коронавируспа çыхăннă ыйтусене Владимир Владимирович тĕплĕн хуравларĕ. Ку тĕлĕшпе пурне те медицина специалисчĕсен сĕнĕвĕсене пăхăнма, хăрушлăха пĕрлехи ăнланулăхпа парăнтармаллине чĕнсе каларĕ.

Рудольф Селиванов, Патăрьел район администрацийĕн пуçлăхĕ:

-Кăçал Раççей Федерацийĕн Президенчĕ Владимир Путин йĕркелекен пресс-конференци ытти çулхипе танлаштарсан куçа-куçăн мар, онлайн мелĕпе иртрĕ. Коронавирус пандемийĕ "Тỹрĕ лини" форматне улăштарчĕ пулин те, хаçат-журналта, радио-телевиденинче тăрăшакан журналистсем, волонтерсем, ытти граждансем хăйсене пăшăрхантаракан ыйтусене çĕршыв Ертỹçине тỹрреммĕнех çитерчĕç.

Пресс-конференцире хускатнă ыйтусем анлă, тĕрлĕ енлĕ. Владимир Владимирович вĕсене пурне те тулли хурав пачĕ. Хăйĕн хуравĕсенче çĕршыв экономикине çирĕплетессипе, наци проекчĕсемпе килĕшỹллĕн сывлăх сыхлавĕнче, вĕрентỹре, цифра экономикинче, çынсене ĕçпе тивĕçтерес, социаллă ыйтусене татса парас тата ытти енĕпе те правительство малашне те йывăрлăхсене пăхмасăр ĕçлеме тĕллев лартнине каларĕ, çулсеренех производствăна ỹстерсе пырса çынсен пурнăç шайне лайăхлатмаллине çивĕчлетрĕ. Сăмах май каласан, наци проекчĕсемпе килĕшỹллĕн Патăрьел районĕнче халăх пурнăçне лайăхлатассишĕн сахал мар ĕç пурнăçланать. Коронавирус пандемийĕ кăларса тăратакан йывăрлăхне пăхмасăр эпир кăçал та наци проекчĕсемпе декабрĕн 1-мĕшĕ тĕлне 40 961,8 пин тенкĕлĕх ĕç пурнăçлама пултартăмăр.

 Пресс-конференцире коронавирус пандемийĕ кăларса тăратакан йывăрлăхсемпе çыхăннă ыйтусем те чылай пулчĕç. Асăннă ыйтусене эпир те районта тивĕçлипе татса пама тăрăшатпăр.

Александр Козлов, Патăрьел районĕн "Авангард" хаçатăн тĕп редакторĕ:

- Раççей Президенчĕ Владимир Путин çуллен иртекен пресс-конференцире коронавирус пандемийĕ тĕнчипех тĕрлĕ чăрмав кăларса тăратни пирки уççăн каларĕ. Çав вăхăтрах çак чире пула Раççейре производство калăпăшĕ, ĕç вырăнĕсемпе çынсен тупăшĕ чакнине те пытармарĕ. Европăри вăйлă аталаннă çĕршывсене, Америкăна тата та вăйлăрах ура хунă иккен çак амак.

Эппин, Раççей çыннисем вăйлăрах: çухалса кайман. Пачах урăхла, пĕр тĕвве пĕрлешсе чире хирĕç тăма пултарнă, паянхи кун та парăнтарма тăрăшаççĕ. Никам та пĕлмен амака хирĕç вакцинăна та пирĕн çĕршыврах шутласа кăларнăшăн епле мăнаçланмăн? Е тата çак тапхăртах 131 миллион тонна тырă туса илни паттăрлăх мар-и? Патăрьел районĕнчи çĕр ĕçченĕсем те калама çук пысăк тухăç - гектартан 35 центнер пухса кĕртме пултарчĕç. Халиччен Юхмапа Пăла тăрăхĕн хура çĕрĕ çакнашкал тыр-пул çитĕнтерменччĕ. Çав вăхăтрах çăкăр хакĕ ỹснишĕн Раççей Президенчĕ те тĕлĕннине пытармарĕ, çывăх вăхăтра лару-тăрăва татса пама шантарчĕ. Медиксен, волонтерсен ĕçне çĕршыв Ертỹçи чун-чĕререн тав туни те кăмăла çĕклет.

Мария Мадюкова, Çĕньял ял тăрăхĕн пуçлăхĕ:

-Раççей Федерацийĕн Президенчĕн Владимир Путинăн пресс-конфенренцине тимлесех итлерĕм. Унта пандеми чирĕ çинчен пĕр хутчен çеç мар сăмах хускатрĕç. Кăшăлвируспа кĕрешме тĕнчери пĕр çĕршыв та хатĕр пулмарĕ. Раççейре вара кĕске хушăрах пациентсене сиплемелли хушма больницăсем хута яма пултарчĕç. Чи малтан вакцина кăларчĕç. Халăха çак вăхăтра электроэнергишĕн, газпа усă курнăшăн тỹлевпе татăлмалли вăхăта пени хушмасăр тăсма ирĕк пачĕç. Ача амăшĕсене пособи парассине улшăнусем кĕртрĕç. Куллен кирлĕ апатсен сутлăх хакĕ ỹснĕрен (сахăр песукĕ, тип çу, çăнăх, çĕршывра вĕсене çителĕклĕ туса илнĕ) малашлăхра ăна шайлашуллă тытса пырасси çинчен те пычĕ сăмах. Йывăрлăхсем маларахри çулсенче те пулман мар.. Халĕ те Владимир Владимирович ертсе пынипе вĕсене çĕнтеретпĕрех.

Рифкать Сафиуллов, Патăрьел, педагогика ĕçĕн ветеранĕ:

-Раççей Президенчĕ Владимир Путин журналистсемпе çуллен йĕркелекен пресс-конференцие кашнийĕнчех итлеме тăрăшатăп. Çакăн пек мероприяти питĕ кирлĕ тесе шухăшлатăп. Вăл халăх шухăшне пĕлме, çĕршывăн тĕрлĕ кĕтесĕнче пулса иртекен ĕçсене тĕрĕс хак пама май парать. Владимир Владимирович патне çитекен ыйтусене вырăнти влаçсем те татса парассипе ытларах вăй хума пуçăнасса шанас килет.

Президент паянхи çăмăл мар лару-тăрура та йывăрлăхсене çĕнтерсе Раççей экономикине аталантарма май тупнине, пĕчĕк тата вăтам предпринимательлĕхе, сахал тупăшлă, нумай ачаллă çемьесене пулăшма тăрăшнине илтме кăмăллă.