Чăваш Республикин Пуçлăхĕ Олег Николаев декабрĕн 24-мĕшĕнче журналистсемпе пресс-конференци ирттерчĕ. Кăçал вăл онлайн мелпе массăллă информаци хатĕрĕнче ĕçлекенсемпе иккĕмĕш хут тĕл пулчĕ. Маларах майăн 20-мĕшĕнче, республикăна ертсе пыма 100 кун çитнипе, йĕркеленĕччĕ. Хальхинче вара Олег Алексеевич çулталăк кăтартăвĕсене пĕтĕмлетрĕ. Пресс-конферецие тỹрĕ эфирта наци телевиденийĕ кăтартрĕ, наци радиовĕ тата "Тăван радио" урлă итлеме май пулчĕ.

2020 çул çĕршывшăн, пĕрлех республикăшăн та коронавирус пандемине пула çăмăлах килмерĕ. Чăваш Ене ертсе пыракан Олег Николаев йывăрлăхсене пăхмасăрах регион Çĕнĕ çула палăртнă тĕллевсене пурнăçланипе кĕтсе илнине, малашлăх валли çирĕп никĕс хывма тăрăшнине пĕлтерчĕ. Кĕскен çеç кăçал тунă ĕç-хĕлпе, республикăн социаллă пурнăçĕпе тата экономикипе паллаштарчĕ.

Икĕ сехет ытла тăсăлнă пресс-конференцие Раççей, республика, район шайĕнчи журналистсем хутшăнчĕç, пĕрлех регионта пурăнакансем те видео урлă халăха хумхантаракан тĕрлĕ ыйтăва хускатрĕç. Олег Алексеевич кашнине тĕплĕн хуравларĕ.

Коронавирус каллех пуç çĕклеме пăхнăран массăллă информаци хатĕрĕнче ĕçлекенсем пандемие хирĕç республикăра еплерех кĕрешнипе, ăна парăнтарассипе мĕнле йышăнусем тунипе кăсăкланчĕç. Чăваш Ен Пуçлăхĕ О. Николаев COVID-19 чир çуркунне пурин умне те йывăрлăхсем кăларса тăратнине, анчах çĕршыв ертỹçи тĕрĕс кăтартусем панипе тивĕçлĕ йышăнусем тунине каларĕ.

Юлашки вăхăтра наци чĕлхине, культурине аталантарма тăрăшни сисĕнме пуçларĕ. Интернет тетелĕнче те чăваш чĕлхине сарассипе ĕçлеме пикеннĕ, анчах ăна малалла вăй илме укçа-тенкĕ пулĕ-ши? "Хыпар" хаçат журналисчĕсем шăпах çакăн пирки ыйтрĕç.

Республика Пуçлăхĕ Олег Николаев чăвашлăха упрассишĕн халь уçăлакан объектсене наци паллисемпе, тĕррисемпе илемлетнине каларĕ. Çав вăхăтрах ачасемпе ялсенче те тăван чĕлхепе калаçманнине тĕслĕхпе çирĕплетрĕ. Апла пулсан кашнийĕн хамăр чĕлхепе пуплеме, çитĕнекен ăрăва ăруран ăрăва куçса пыракан йăла-йĕркене вĕрентме тăрăшмалла. Республикăн кăнтăр районĕсенче - Патăрьел, Шăмăршă, Комсомольски, Елчĕк - пурăнакансен ĕçме пахалăхлă шыв çук. Ăна Шăмăршăри управран илсе килмеллеччĕ, анчах ĕç чарăнса ларчĕ. Районти "Авангард" хаçатăн тĕп редакторĕ Александр Козлов шăпах шыв ыйтăвне хускатрĕ. Олег Алексеевич 2021 çулта шывпа тивĕçтерессипе тăрăшма пуçăннипе, 2021-2023 çулсем валли 1690,4 млн тенкĕ укçа уйăрма планланине, вăл шутран 1534,7 млн тенкĕ федераци бюджетĕнчен килнине каларĕ. Апла пулсан эпир та таса шыв ĕçĕпĕр.

Видео-çыхăну-конференцинче республикăри авариллĕ çуртсене çĕнетесси, кĕçĕн классенче вĕренекенсене тỹлевсĕр çитерни, коммуналлă тарифсен хакĕсем пирки тата ытти ыйтусене те хускатрĕç.