- Октябрĕн 25-28-мĕшĕсенче республикăн тĕп хулинче Мухтавлă ентешсен çулталăкне халалласа "Хамăрăннисене пĕл" ("Знай наших") ентешсен форумĕ иртрĕ. Унта Чăваш Енĕн пултаруллă хастарĕсем çĕр шывăн тĕрлĕ кĕтесĕнчен, ют çĕршывран та килнĕ. Эпир "Чăваш Енри çамрăк предприниматель _2022" хисеплĕ ята тивĕçнĕ "Эко продукт" производство кооперативĕн председателĕпе Илмир Халитовпа тата Камиль Салихов фермер хуçалăхĕн ертỹçипе стратегилле сессие хутшăнтăмăр. Пирĕн ушкăнта бизнес-общество хастарĕсем, муниципалитет округĕн представителĕсем, çамрăксем пулчĕç. Сессире ушкăнсене пайланса кашниех тăван Чăваш Республикин экономикипе социаллă пурнăçĕн аталанăвне 2035 çулччен хамăр куçпа мĕнле курнине ăнлантартăмăр, сăнларăмăр. Стратегилле вăййа хутшăнакансем уйрăмах халăх пурăнакан вырăна хăтлăх кĕртессипе, медицинăна, вĕрентỹ отрасльне, бизнеса аталантарассипе çыхăннă хăватлă плансемпе паллаштарчĕç. Форум питĕ кăмăллă иртрĕ. Ентешсен çак пархатарлă шухăшĕсем пурнăçа кĕрсен Чăваш Республикин бренчĕ Раççей шайĕнче тата ытларах ỹсĕ, тулаш экономикăри хутшăну та вăйланĕ.

Фоторепортаж