Порталта – наци проекчěсем

Çак кунсенче ЧР Правительство çуртĕнче çĕнĕ портал презентацийĕ иртрĕ. «Мана килĕшрĕ», — тенĕ программистсен ĕçне хакласа Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев. Республикăра пурăнакан ытти çынна та килĕшессĕн туйăнать. Кашни наци проекчĕ тĕлĕшпе уçăмлă информаци пур — мĕнле объектсем хута кайни, халь мĕнле проектсемпе ĕçлени тата çитес вăхăтра хăш енĕпе ĕçлесси таранах. Олег Алексеевич порталти информацие тата пуянлатмаллине палăртнă, ăна çĕнетсех пымалли пирки асăрхаттарнă. Республикăн наци проекчĕсен порталне ăçта шырамаллине палăртмалли кăна юлать: http://np.cap.ru ссылкăпа кĕрĕр те — интереслине тупатăрах. Çав шутра, паллах, эсир пурăнакан хулара е районта наци проекчĕсемпе килĕшÿллĕн пурнăçлакан ĕçпе те паллашма пултаратăр.

Ипотека пама тытăннă

Апрелĕн 17-мĕшĕнче пирĕн республикăра ял çыннисене 0,1 процентлă ипотека пама тытăннă. Тĕрĕсрех, çĕнĕ йышăну вăя кĕнĕ. Аса илтеретпĕр, ял ипотекине çĕршывра 3 процент тесе палăртнăччĕ. Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаев сĕннипе вара пирĕн республикăра процент ставкине татах та пĕчĕклетнĕ, Министрсен Кабинчĕ ятарлă хушăва алă пуснă.  Пĕчĕк ставкăпа кредит илме тивĕç категорие çаксем кĕнĕ: ялта ĕçлесе пурăнакан виçĕ е ытларах ача çитĕнтерекен çемьесене  ипотекăна 0,1 процентпа парĕç, АПКра тата ветеринарта ĕçлекенсене – 0,5 процентпа, социаллă сферăра ĕç килĕшĕвĕпе е усламçă пулса тăрăшакансене – 1 процентпа, ялта потребкоопераци тата ял хуçалăх кооперацийĕнче  тăрăшакансене – 1 процентпа, ялта пурăнакан АПКра ĕçлеме шухăш тытнисене – 1,5 процентпа, ялти социаллă сферăра ĕçе кÿлĕнес шухăшлисене – 2 процентпа.

Заявкăсем йышăнаççĕ

Чăваш Енре «Земство учителĕ» федераци программипе тăватă çынна ĕçе илĕç. Заявкăсене Чăваш Республикин Вĕрентÿ институтĕнче июнĕн 1-мĕшĕччен йышăнĕç. Программăна хутшăнас текенсен 50 пинрен сахалрах пурăнакан ял-хулари шкулсенче пилĕк çултан кая мар ĕçлемелле. Çавăн пек килĕшÿ тунă вĕренткенсене 1 миллион тенкĕ укçа парĕç.

Конференци иртнĕ

Шупашкарта тăван (чăваш чĕлхи) вĕрентекенсен конференцийĕ иртнĕ. Унта  хулари шкул ачисене чăваш чĕлхи урокĕсене дистанци мелĕпе ирттерес ыйтăва сÿтсе явнă. Конференцие Шупашкар хулинчи «Вĕрентÿ мониторингĕн тата аталанăвĕн центрĕ» учреждени йĕркеленĕ.

600 ытла çынна пулăшнă

Пĕтĕм Раççейри пекех, пирĕн республикăра та коронавирус сарăласран пурнăçламалли условисемпе килĕшÿллĕн ватăсене пулăшма регионти "Эпир пĕрле" (#МЫВМЕСТЕ) штаб ĕçлет. Çак кунсенче волонтерсенчен 600 ытла çын пулăшу ыйтнă. Ытларахăшне аптекăран эмел, лавккаран çимеллисем кирлĕ пулнă. Пулăшу ыйтас тесен çак номерпе шăнкăравламалла:  8-800-200-34-11. Волонтер пулас тесен мывместе2020.рф. сайтра вĕренÿ витĕр тухмалла. Хальхи вăхăтра Чăваш Енри 500 яхăн хастар çамрăк регистрациленнĕ, вĕренÿ витĕр тухнă.