ПУШАР тухас хăрушлăхран асăрхаттарас тĕллевпе Патăрьелĕнчи 26-мĕш пушар чаçĕнче ĕçлекенсем ялсенче профилактика рейчĕсем ирттереççĕ. Хальхинче вĕсем Патăрьелĕнчи Талвир урамĕнче пурăнакансем патне çитнĕ. Вут-çулăмран асăрханмалли тĕп йĕркесемпе, инкекре мĕнле тытмалли пирки ăнлантарса панă, çавăн пекех памяткăсем панă.

Сăмах май, çак кунсенче Çĕнĕ Ахпÿртре автомашина, Патăрьелĕнчи Киров урамĕнче хваттер, Кивĕ Катекре мунча пушарта сиенленнĕ.

Вут-çулăмпа кĕрешекенсем çанталăк шăрăх чухне уйрăмах тимлĕ пулмаллине аса илтереççĕ: çулăмпа асăрхануллă усă курмалла, электропроводкăсемпе электроприборсен юсавлăхне тĕрĕслесех тăмалла, кил-çуртра, хуçалăхра пушар хăрушсăрлăхне пăхăнмалла. Çулăм йăлкăшнине курсанах 101 е 112 телефонпа шăнкăравламалла.