Коронавирус инфекцийĕ сарăлас хăрушлăх пысăккине шута илсе ЧР Патшалăх Канашĕн черетлĕ вăтăр тăххăрмĕш сессине те çĕнĕлле йĕркеленĕ: патшалăх влаçĕн органĕсен представителĕсем унта видеоконференцçыхăну мелĕпе хутшăннă. Министрсем тата ведомство ертÿçисем кун йĕркинчи ыйтусемпе видеоçыхăну урлă калаçнă, депутатсен ыйтăвĕсене хуравланă. Чăваш Ен Пуçлăхĕн тивĕçĕсене вăхăтлăх пурнăçлакан Олег Николаев та сессие асăннă мелпех хутшăннă.

Парламентарисем Раççей Федерацийĕн Генеральнăй прокурорĕн сĕнĕвне — Чăваш Республикин прокурорĕн должноçне Андрей Фомина лартасси пирки — пĕр саслăн пулса ырланă. Андрей Валерьевичпа генпрокурорăн  заместителĕ  Сергей  Зайцев  видео-

çыхăну мелĕпе паллаштарнă. Андрей Фомин 1965 çулта Владимир облаçĕнчи Киржач хулинче çуралнă. 1992 çултанпа Ярославль облаçĕн прокуратурин органĕсенче ĕçленĕ. 2010-2014 çулсенче Ярославль облаçĕн прокурорĕн заместителĕ пулнă. 2014 çулхи августранпа — Крым Республикин прокурорĕн пĕрремĕш заместителĕ. Андрей Валерьевич сессие хăй килнĕ, çавна май депутатсем ăна тĕрлĕ ыйту панă. Парламент унăн кандидатурине ырланă, халĕ ăна Раççей Федерацийĕн Президенчĕн çирĕплетмелле.

Вăтăр тăххăрмĕш сессире нумайăшĕ тахçантанпах кĕтекен саккунăн — «Вăрçă ачисем çинчен» — проектне пăхса тухнă. Аса илтеретпĕр, Чăваш Ен Пуçлăхĕн тивĕçĕсене вăхăтлăх пурнăçлакан Олег Николаев РФ Патшалăх Думин депутачĕ пулнă вăхăтрах «вăрçă ачисен» статусне палăртасшăн пулнă. Акă тинех депутатсем Чăваш Республикин «Вăрçă ачисем çинчен» саккунне йышăнас тесе сасăланă.

Парламентăн Социаллă политика тата наци ыйтăвĕсемпе ĕçлекен комитечĕн председателĕ Вячеслав Рафинов пĕлтернĕ тăрăх — «вăрçă ачисем» категорие Раççейĕн 1927 çулхи июнĕн 22-мĕшĕнчен пуçласа 1945 çулхи сентябрĕн 3-мĕшĕччен çуралнă гражданĕсем, Чăваш Республикинче пурăнакансем, кĕреççĕ. Саккунра «вăрçă ачисен» юридици статусне çирĕплетнĕ, вĕсене удостоверени памаллине, финанспа çыхăнман социаллă гарантисемпе тивĕçтермеллине палăртнă. «Вăрçă ачисене» социаллă пулăшу кÿрекен учрежденисенче /тĕслĕхрен, ветерансем, сусăрсем, пенсионерсем валли тунă интернат çуртсенче/, медицина организацийĕсенче черетсĕр йышăнĕç, пахалăхлă пулăшупа тивĕçтерĕç. Килте социаллă пулăшупа усă курас текенсен те черет кĕтме тивмĕ. Олег Николаев шухăшĕпе — «вăрçă ачисен» статусне саккунпа çирĕплетнĕ хыççăн малашне финанс пулăшăвĕн мерисене те йышăнма майсем пулĕç, паллах, республика хыснин майĕсене шута илсе. Патшалăх Канашĕн депутачĕсем çак саккуна пурте пĕр саслăн пулса йышăннă. Аслă ăрури çынсем тепĕр самантшăн та питĕ савăнасси иккĕлентермест: Чёваш Ен Пу=лёх.н тив.=.сене вёхётлёх  пурнё=лакан Олег Николаев хушăвĕпе килĕшÿллĕн Тăван çĕршывăн Аслă вăрçине хутшăннисене тата инваличĕсене 25-шер пин тенкĕ хушса тÿлесси. Алена Елизарова министр сессире пĕлтернĕ тăрăх — çак укçана май уйăхĕнче, Çĕнтерÿ кунĕччен, парĕç.

(«Хыпар» хаçатран  кĕскетсе пичетленĕ).