Трактор  кăларма пуçлĕç

"Трактор завочĕсем" концерн РФ Правительстви пĕчĕк тата вăтам хăватлă ял хуçалăх техникине аталантарма лартнă тĕллеве тĕпе хурса Чăваш Республикинче çĕнĕ производство пуçарма палăртнă. Кунта хальхи вăхăтри экологи требованийĕсене туллин тивĕçтерекен, тĕрлĕ оборудовани çакса усă курма май паракан тракторсем кăларма пуçлĕç. Çулталăкра 5 пин ытла трактор пухса хатĕрлеме палăртнă. Чăваш Республикин тивĕçĕсене вăхăтлăх пурнăçлакан Олег Николаев палăртнă тăрăх, республикăра проекта пурнăçа кĕртме майсем пур, производство хăвачĕ те çителĕклĕ, специалистсене вĕрентсе хатĕрленĕ чухне те чăрмавсем пулас çук. "Проекта хăвăртрах ĕçе кĕртни Чăваш Еншĕн те пĕлтерĕшлĕ, усăллă", _  тенĕ регион ертÿçи. Сăмах май, ку проект Олег Алексеевич ĕçлеме пуçланăранпа иртнĕ икĕ уйăхри çитĕнĕвĕсенчен пĕри. Ăна Олег Николаев федераци центрĕпе пĕр чĕлхе тупса ĕçленипе Чăваш Енре пурнăçа кĕртме йышăннă.

Чĕрĕ палăк

Тăван çĕршывăн Аслă вăрçинче çĕнтернĕренпе 75 çул çитнине халалласа çĕршывра «Асăну сачĕ» акци пырать. Республикăри пур районта та вăрçăра вилнĕ ентешĕмĕрсене асăнса йывăçсем лартаççĕ.