Ялта пурăнакансем яланах выльăх-чĕрлĕх, чăх-чĕп усранă. Паян та çаплах. Эпир те мăшăрпа çемье çавăрсанах выльăх тытма пуçланă. Витере икшер ĕне, тăватшар вăкăр та тăнă. Паян та чĕлхесĕр янаварсем пур, вĕсемсĕр ĕç çук пекех туйăнать. Хĕлле ăшă пỹртре алă усса ларса вăхăта ирттерме те йывăр, вĕсем патне тухсан чун йăпанать.

Выльăхсем те çынсем пекех, чирлесси те, аманасси те пулать. Инкекрен эпир вĕсене çулленех страхлатпăр. Кăçалхи апрелĕн 23-мĕшĕнче 750-800 килограмм таякан ĕне пăруланă хыççăн вăй илсе каяймарĕ. Районти выльăх-чĕрлĕх чирĕсемпе кĕрешекен станци специалисчĕсем тем пек тăрăшрĕç пулсан та чĕртсе хăвараймарĕç. Юрать-ха, пăрăвĕ тăрса юлчĕ. Ветеринарсем панă документсемпе "Наско" страхлакан компанине çитрĕм. Çурт-йĕре те, ĕне-выльăха та унта страхланăччĕ. Анчах вăхăт иртет, пире укçа паракан çук. Пĕрре кайрăм, иккĕ... Унтан компанин Патăрьелĕнчи ертỹçи М. Ялукова тата страховщик компани панкрута тухнине, РФ Тĕп банкĕ "Наскоран" лицензине турса илнине пĕлтерчĕç. Çапла вара пирĕн "шанчăклă" компанин ячĕ те юлмарĕ. Мĕн тумалла? 45 пин тенке камран шыраса илмелле? Сăмах май, асăннă компанинче вăй хуракансем хăйсен май уйăхĕнчи шалăвне те илеймесĕр нушаланаççĕ, тет.

Строительство организацийĕсем панкрута тухнине ĕненме пулать-ха, анчах страхлакан компани çука юлни ăша вырнаçмасть. Вăл выльăх-чĕрлĕхе çеç мар, çурт-йĕре те, техникăна та страхлать. Халăхран пухăннă укçапа çеç пурăнать-çке!

В. Селиванов. Кĕçĕн Арапуç ялĕ.